នាថ្ងៃទី០៧ ខែវិច្ឆិកា ឆ្នាំ២០២៤ ឯកឧត្តម ម៉ូត យូសុះ សមាជិកគណៈកម្មការទី១ នៃរដ្ឋសភា តំណាងរាស្ត្រមណ្ឌលត្បូងឃ្មុំ និងប្រធានអង្គការមូលនិធិអភិវឌ្ឍន៍មុស្លិមកម្ពុជាខេត្តត្បូងឃ្មុំ តំណាងដ៏ខ្ពង់ខ្ពស់ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា និងតំណាងអង្គការហាសាណះអន្តរជាតិ បានអញ្ជើញសម្ពោធ និងប្រគល់ផ្ទះសប្បុរសធម៌ ជូនប្រជាពលរដ្ឋមានជីវភាពខ្វះខាត ចាស់ជរា និងស្ត្រីមេម៉ាយ ចំនួន ៦ខ្នង គោចិញ្ចឹមចំនួន ៥ក្បាល និងម៉ាស៊ីនកាត់ដេរចំនួន ​៣ ឈុត សរុបជាថវិកា ២៦៥០០ អឺរ៉ូ ( ២៨៤៣៩ ដុល្លារ) នៅខេត្តត្បូងឃ្មុំ ដើម្បីកាត់បន្ថយភាពក្រីក្រនៅក្នុងសហគមន៍ និងបង្កើតមុខរបរប្រចាំថ្ងៃជូនប្រជាពលរដ្ឋ។

គម្រោងខាងលើជាគម្រោងហ្សាកាត់(បរិច្ចាក)   របស់អង្គការហាសាណះអន្តរជាតិ សហការជាមួយអង្គការមូលនិធិអភិវឌ្ឍមុស្លិមកម្ពុជា(CMDF)។

គួរបញ្ជាក់ថា អង្គការអន្តរជាតិ Hasene បាននឹងកំពុងធ្វើកិច្ចសហប្រតិបត្តិការជិត ១០០ ប្រទេស ក្នុងនោះក៏មានកម្ពុជាផងដែរ ដែលបានផ្តល់ជំនួយជាច្រើន តាមរយៈអង្គការ CMDF និងIMAC មានដូចជា ជំនួយសង្គ្រោះបន្ទាន់ ជំនួយកញ្ចប់អាហារខែរ៉ាម៉ាឌន ជំនួយគោគួរបាន គម្រោងជំនួយបរិច្ចាក(ហ្សាកាត់) ចិញ្ចឹមកុមារកំព្រា ផ្តល់អាហារូបករណ៍ សាងសង់ផ្ទះជូនជនក្រីក្រ និងផ្តល់គោចិញ្ចឹម សរុបថវិកាជាង ២ លានដុល្លារអាមេរិក៕