សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានិងគណៈប្រតិភូជាន់ខ្ពស់រដ្ឋសភាកម្ពុជាបានអញ្ជើញទស្សនា ការិយាល័យមូលដ្ឋាន សភាប្រជាជនក្រុងសៀងហៃ ដែលជាកន្លែងសម្រាប់ភ្ជាប់ទំនាក់ទំនងស្ថាប័នសភានិងប្រជាពលរដ្ឋ ក្នុងការផ្តល់យោបល់ លើសេចក្តីព្រាងច្បាប់នានា។

ក្រុងសៀងហៃ បានអនុវត្តប្រជាធិបតេយ្យបែបប្រជាជនគ្រប់ដំណាក់កាល នៅក្នុងការអភិវឌ្ឍសង្គមរបស់ខ្លួន។  ដោយយកប្រជាពលរដ្ឋជាស្នូល ទីក្រុងសៀងហៃ បានក្លាយជាមជ្ឈមណ្ឌលសំខាន់របស់ សកលលោកផ្នែកពាណិជ្ជកម្ម សេដ្ឋកិច្ច កំពង់ផែ ការដឹកជញ្ជួនផ្លូវទឹក វិទ្យាសាស្ត្រ បច្ចេកវិទ្យា និងនវានុវត្តន៍ ។

សម្តេចរដ្ឋសភាធិបតី ប្រធានរដ្ឋសភា បានសម្តែងនូវការកោតសរសើរនិងវាយតម្លៃខ្ពស់ ចំពោះសភាតំណាងប្រជាជនចិនក្រុងសៀងហៃ ដែលបានរួមចំណែក យ៉ាងសំខាន់ដល់វឌ្ឍនភាព និងការរីកចម្រើនរបស់ក្រុងសៀងហៃ ស្របតាមគោលដៅជាតិដ៏ទូលំទូលាយ និងរួមចំណែកដល់គោលដៅសេដ្ឋកិច្ច និងយុទ្ធសាស្ត្រ រួមរបស់ប្រទេសចិនទាំងមូល។

សម្តេចរដ្ឋសភាធិបតី ឃួន សុដារី បានគូសបញ្ជាក់ថា ទោះបីជាដំណើរទស្សនកិច្ចនៅទីក្រុងសៀងហៃ មានរយៈពេលខ្លីក៏ពិតមែន ប៉ុន្តែជាដំណើរទស្សនកិច្ច មួយដ៏មានតម្លៃ គួរចងចាំ និងមានសារៈសំខាន់បំផុត ព្រោះបានផ្តល់នូវឱកាសបានសិក្សា ស្វែងយល់ និងរៀនសូត្របានយ៉ាងច្រើនពីមិត្តចិន ព្រមទាំងបង្កើនបាននូវភាពជិតស្និទ្ធនៃការផ្សារភ្ជាប់ទំនាក់ទំនងរវាងប្រទេសទាំងពីរ ជាពិសេសទំនាក់ទំនងជាមួយក្រុងសៀងហៃផ្ទាល់តែម្តង ហើយសង្ឃឹមថា ការផ្លាស់ប្តូរបែបនេះនឹងកើតមានជាបន្តទៀតនាពេលអនាគត៕