សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៅព្រឹកថ្ងៃទី១៥ ខែវិច្ឆិកា ឆ្នាំ២០២៣នេះ បានចូលរួមមហាសន្និបាតរណសិរ្សសាមគ្គី អភិវឌ្ឍន៍មាតុភូមិកម្ពុជា លើកទី៦ នៅសណ្ឋាគារសុខាភ្នំពេញ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា និងជាប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា និងសម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ។
ពិធីនេះក៏មានការអញ្ជើញចូលរួមពីសំណាក់ ប្រធាន សមាជិក សមាជិកា គណៈកម្មាធិការរណសិរ្ស ក្រសួង ស្ថាប័ន រាជធានី ខេត្ត និងភ្ញៀវជាតិ អន្តរជាតិជាច្រើនរយនាក់។ មហាសន្និបាតប្រារព្ធធ្វើឡើងដើម្បីពិនិត្យសកម្មភាពដែលបានអនុវត្តនាពេលកន្លងមក និងការលើកទិសដៅអនុវត្តបន្ត។
រណសិរ្សសាមគ្គីអភិវឌ្ឍន៍មាតុភូមិកម្ពុជា បានប្តូរឈ្មោះមកពី រណសិរ្សសាមគ្គីសង្រ្គោះជាតិកម្ពុជា ដែលជាអង្គការមហាជនប្រមូលផ្តុំកម្លាំងសាមគ្គីអ្នកស្នេហាជាតិទាំងក្នុង និងក្រៅប្រទេស ដឹកនាំបង្កើតឡើងដោយ សម្តេចអគ្គមហាពញាចក្រី ហេង សំរិន សម្តេចអគ្គមហាធម្មពោធិសាល ជា ស៊ីម និងសម្តេចអគ្គមហាសេនាបតីតេជោ ហ៊ុន សែន និងវីរជនស្នេហាជាតិ ជាច្រើនរូបទៀត ក្នុងតំបន់រំដោះ នាភូមិជើងឃ្លូ ឃុំ២ធ្នូ ស្រុកស្នួល ខេត្តក្រចេះ ដើម្បីរួមកម្លាំងផ្តួលរំលំរបបប្រល័យពូជសាសន៍ ប៉ុល ពត នៅថ្ងៃទី៧ មករា ឆ្នាំ១៩៧៩។ មានរណសិរ្ស២ធ្នូ ទើបមាន៧មករាឆ្នាំ១៩៧៩ ហើយមានថ្ងៃរំដោះ៧មករាឆ្នាំ១៩៧៩ ទើបប្រទេសជាតិ និងប្រជាពលរដ្ឋទទួលបាននូវសុខសន្តិភាព និងការអភិវឌ្ឍដូចសព្វថ្ងៃ ៕
អត្ថបទ និងរូបភាព ដោយនាយកដ្ឋានព័ត៌មាន