ស្ទឹងត្រែង៖ឯកឧត្តមបណ្ឌិត លី ឆេង អនុប្រធានគណៈកម្មការទី៩ នៃរដ្ឋសភា (តំណាង លោក​ជំទាវ និន សាផុន ប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិលប្រៃស​ណី​យ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំ​ដែនដី នគរូបនីយកម្ម និងសំណង់ នៃរដ្ឋសភា) នៅថ្ងៃទី១៦ ខែមិថុនា ឆ្នាំ​២០២៦ បានដឹកនាំគណៈប្រតិភូចុះជួបពិភាក្សាការងារជាមួយថ្នាក់ដឹកនាំខេត្តស្ទឹងត្រែង ដឹកនាំ​ដោយ ឯកឧត្តម ឈាង ឡាក់ ប្រធានក្រុមប្រឹក្សាខេត្ត និងឯកឧត្តម សរ សុពុត្រា អភិបាល​ខេត្ត ដោយ​មានការអញ្ជើញចូលរួមពី ឯកឧត្តមសន្តិបណ្ឌិត ឡូយ សុផាត តំណាងរាស្ត្រមណ្ឌល​ខេត្តស្ទឹងត្រែង។

គោលបំណងសំខាន់នៃជំនួប គឺដើម្បីស្វែងយល់ពីលទ្ធផលការងារ និងការអនុវត្តយុទ្ធសាស្ត្របញ្ច​កោណ-ដំណាក់កាលទី១ របស់រដ្ឋបាលខេត្តពិនិត្យប្រសិទ្ធភាពនៃការអនុវត្តច្បាប់ និងប្រមូល​ព័ត៌មាន​ជុំវិញបញ្ហាប្រឈមនានា ប្រមូលសំណូមពររបស់ខេត្ត ដើម្បីរាយការណ៍ជូន​គណៈកម្មា​ធិការអចិន្ត្រៃយ៍រដ្ឋសភា ។

ជាលទ្ធផល គណៈកម្មការទី៩បានវាយតម្លៃខ្ពស់ចំពោះកិច្ចខិតខំប្រឹងប្រែង​របស់រដ្ឋបាល​ខេត្តនិងបានផ្តល់អនុសាសន៍គន្លឹះៗលើការអភិវឌ្ឍហេដ្ឋារចនាសម្ព័ន្ធ (ផ្លូវ ទឹក ភ្លើង) ការ​គ្រប់គ្រងអាជីវកម្មរ៉ែ ការចុះបញ្ជីដីធ្លី ការធ្វើបរិវត្តកម្មឌីជីថល (Digital Transformation) ក្នុងការផ្តល់សេវាសាធារណៈ និងការផ្សព្វផ្សាយច្បាប់ឱ្យកាន់តែទូលំទូលាយ៕