ភ្នំពេញ៖ គណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា (គណៈកម្មការទី៣) កំពុងត្រៀមលក្ខណៈចុះបំពេញបេសកកម្មការងារស្រាវជ្រាវ និងតាមដានការអនុវត្តច្បាប់នៅខេត្តតាកែវ និងខេត្តកំពត ក្នុងអំឡុង ខែមិថុនា ឆ្នាំ២០២៦ ខាងមុខនេះ។
ផែនការចុះបំពេញបេសកកម្មនៅតាមបណ្តាខេត្តនេះ ត្រូវបានលើកយកមកពិភាក្សា និងពិនិត្យលម្អិត នៅក្នុងកិច្ចប្រជុំផ្ទៃក្នុងរបស់គណៈកម្មការ ដែលដឹកនាំដោយ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការទី៣ កាលពីរសៀលថ្ងៃទី២០ ខែឧសភា ឆ្នាំ២០២៦ ម្សិលមិញនេះ នៅវិមានរដ្ឋសភា។
របៀបវារៈសំខាន់ៗចំនួន ៣ ដែលត្រូវបានឆ្លងក្នុងកិច្ចប្រជុំរួមមាន៖
១.ការចុះបេសកកម្មតាមខេត្ត៖ ត្រៀមលក្ខណៈគ្រប់ជ្រុងជ្រោយសម្រាប់ការចុះបំពេញការងារនៅខេត្តតាកែវ និងខេត្តកំពត នៅក្នុងអំឡុងខែមិថុនា ឆ្នាំ២០២៦។
២.ការរៀបចំសិក្ខាសាលាធំ៖ ពិនិត្យឯកសារពាក់ព័ន្ធដើម្បីត្រៀមរៀបចំ «សិក្ខាសាលាថ្នាក់ជាតិ ស្តីពីអភិបាលកិច្ចអាកាសធាតុ» ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០២៦ ខាងមុខ។
៣.ការងារផ្ទៃក្នុង៖ ពិភាក្សា និងផ្លាស់ប្តូរមតិលើការងារផ្ទៃក្នុងចាំបាច់មួយចំនួនទៀតរបស់គណៈកម្មការ។
កិច្ចប្រជុំត្រៀមលក្ខណៈដ៏មានសារៈសំខាន់នេះ ក៏មានការអញ្ជើញចូលរួមពីសំណាក់ ឯកឧត្តមអនុប្រធាន ឯកឧត្តមលេខាធិការ សមាជិក សមាជិកាគណៈកម្មការ ព្រមទាំងទីប្រឹក្សា និងមន្ត្រីជំនួយការជំនាញរបស់គណៈកម្មការទី៣ នៃរដ្ឋសភាផងដែរ ដើម្បីធានាឱ្យសកម្មភាពការងារខាងមុខ ទាំងការរៀបចំសិក្ខាសាលាថ្នាក់ជាតិ និងការចុះបំពេញបេសកកម្មតាមខេត្ត ទទួលបានលទ្ធផលផ្លែផ្កាខ្ពស់បំផុតតាមការគ្រោងទុកផងដែរ៕