វិមានរដ្ឋសភា៖ ការងារត្រៀមលក្ខណៈសម្បត្តិទាំងផ្នែកបច្ចេកទេស ពិធីការ បដិសណ្ឋារកិច្ច និងខ្លឹមសារ ដើម្បីបម្រើឱ្យការរៀបចំធ្វើជាម្ចាស់ផ្ទះសន្និសីទសភាជាតិស្តីពី «អភិបាលកិច្ចអាកាសធាតុ» នៅសប្តាហ៍ក្រោយ ត្រូវបានប្រកាសថា បានវិវត្តទៅមុខយ៉ាងរលូន និងជិតរួចរាល់ស្ទើរតែទាំងស្រុងហើយ បន្ទាប់ពីមានកិច្ចប្រជុំត្រួតពិនិត្យយ៉ាងហ្មត់ចត់ពីគណៈកម្មការជំនាញ និងថ្នាក់ដឹកនាំជាន់ខ្ពស់នៃអគ្គលេខាធិការដ្ឋានរដ្ឋសភា។

ការបញ្ជាក់ឱ្យដឹងពីវឌ្ឍនភាពការងារដ៏សកម្មនេះ ធ្វើឡើងក្នុងកិច្ចប្រជុំត្រួតពិនិត្យវឌ្ឍនភាព និងពិនិត្យឯកសារពាក់ព័ន្ធ នាសៀលថ្ងៃទី២០ ខែឧសភា ឆ្នាំ២០២៦ ក្រោមអធិបតីភាពដឹកនាំដ៏ខ្ពង់ខ្ពស់របស់    ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយមនៃរដ្ឋសភា (គណៈកម្មការទី៣)។

នៅក្នុងអង្គប្រជុំដែលមានការចូលរួមពី ឯកឧត្តម លោកជំទាវ ជាតំណាងរាស្ត្រ, ឯកឧត្តម ឡេង ប៉េងឡុង អគ្គលេខាធិការរដ្ឋសភា និងឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការ និងជានាយកខុទ្ទកាល័យសម្តេចប្រធានរដ្ឋសភា ក្រុមការងារបានពិភាក្សាលម្អិតលើផែនការសកម្មភាព និងការសម្របសម្រួលជាមួយភាគីពាក់ព័ន្ធទាំងអស់។ គោលបំណងគឺដើម្បីធានាឱ្យសន្និសីទសភាជាតិមួយនេះ ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០២៦ ខាងមុខ ដំណើរការទៅដោយរលូន និងសម្រេចបានជោគជ័យយ៉ាងត្រចះត្រចង់តាមការរំពឹងទុក។

នៅឱកាសនោះ ឯកឧត្តមសន្តិបណ្ឌិត ឡូយ សុផាត បានមានប្រសាសន៍សង្កត់ធ្ងន់ថា៖«បញ្ហាការប្រែប្រួលអាកាសធាតុនាពេលបច្ចុប្បន្ន បានក្លាយជាបញ្ហាសកលដ៏សំខាន់ និងមានឥទ្ធិពលផ្ទាល់ដល់ការអភិវឌ្ឍប្រកបដោយចីរភាព»។

ក្នុងន័យនេះ ឯកឧត្តមប្រធានគណៈកម្មការទី៣ បានជំរុញ និងលើកទឹកចិត្តឱ្យមានការអញ្ជើញ ឯកឧត្តម លោកជំទាវ ជាសមាជិក សមាជិកា រដ្ឋសភា និងព្រឹទ្ធសភា រួមទាំងអ្នកសិក្សាស្រាវជ្រាវ សិស្ស និស្សិត និងអ្នកជំនាញពាក់ព័ន្ធទាំងជាតិនិងអន្តរជាតិ ចូលរួមឱ្យបានកុះករ ដើម្បីរួមគ្នាស្វែងយល់ ជជែកពិភាក្សាវែកញែក និងរួមគ្នាជំរុញកិច្ចការងារអភិបាលកិច្ចអាកាសធាតុនេះឱ្យកាន់តែមានប្រសិទ្ធភាពខ្ពស់សម្រាប់ជាតិ។

ទន្ទឹមនឹងនោះ ឯកឧត្តមសន្តិបណ្ឌិត ក៏បានណែនាំឱ្យក្រុមការងារបច្ចេកទេស បន្តធ្វើការពិនិត្យផ្ទៀងផ្ទាត់ និងបញ្ចូលរាល់ធាតុចូលសំខាន់ៗចុងក្រោយដែលអង្គប្រជុំបានលើកឡើង ដើម្បីធានាថា កម្មវិធីសន្និសីទសភាជាតិទាំងមូលមានភាពហ្មត់ចត់ និងកាត់បន្ថយឱ្យបានជាអតិបរមានូវរាល់ចន្លោះប្រហោងដែលអាចនឹងកើតមានឡើង៕