ខេត្តព្រៃវែង៖ ឯកឧត្តម ជាម ប៉េអា តំណាងរាស្ត្រមណ្ឌលខេត្តព្រៃវែង និងជាសមាជិកគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា នាព្រឹកថ្ងៃទី១០ ខែឧសភា ឆ្នាំ២០២៦ អមដំណើរដោយអគ្គនាយកក្រុមហ៊ុន MSA បានអញ្ជើញសំណេះសំណាល និងលើកទឹកចិត្តដល់យុវជនឆ្នើមក្នុងវិស័យកីឡា និងការសិក្សា នៅវិទ្យាល័យព្រៃដើមថ្នឹង ស្រុកស៊ីធរកណ្ដាល។

ក្នុងឱកាសនោះ ឯកឧត្តមបានជួបជាមួយក្រុមកីឡាបាល់ទាត់នារី កីឡាករបោះប៊ូល និងសិស្សជ័យលាភីមេដាយមាសផ្នែកគណិតវិទ្យាថ្នាក់ទី១២ ទូទាំងប្រទេស ដោយបានជំរុញលើកទឹកចិត្តឲ្យយុវជនទាំងអស់បន្ត វិនិយោគលើចំណេះដឹង និងវិន័យជាជាងសម្ភារៈក្រៅខ្លួន, កុំខ្លាចកំហុស តែត្រូវខ្លាចការខ្វះការតស៊ូ និងត្រូវពង្រឹងភាពធន់ចំពោះឧបសគ្គ , បន្តប្រើប្រាស់ ពេលវេលា ២៤ ម៉ោងឱ្យមានប្រសិទ្ធភាពដើម្បីអភិវឌ្ឍសមត្ថភាព និងចេះប្រើប្រាស់បច្ចេកវិទ្យា និងទិន្នន័យដើម្បីដោះស្រាយបញ្ហាសង្គម ក្នុងយុគសម័យឌីជីថល និងក្រោមម្លប់សន្តិភាពនេះផងដែរ។

ជាមួយគ្នានេះ ឯកឧត្តមបានឧបត្ថម្ភភេសជ្ជៈប៉ូការីស្វេត ចំនួន ២០០ កេស និងសម្ភារកីឡាមួយចំនួនធំ ដើម្បីគាំទ្រដល់ក្រុមកីឡាបាល់ទាត់នារីវិទ្យាល័យព្រៃដើមថ្នឹង ដែលត្រូវត្រៀមខ្លួនចេញទៅប្រកួតតំណាងឱ្យ ស.ស.យ.ក. ស្រុកស៊ីធរកណ្ដាល នៅរាជធានីភ្នំពេញនាពេលខាងមុខ។

ជាការឆ្លើយតប ក្រុមកីឡាការិនីបានប្ដេជ្ញាចិត្តខិតខំប្រកួតឱ្យអស់ពីសមត្ថភាព ដើម្បីដណ្ដើមជ័យលាភីជូនស្រុកកំណើតរបស់ខ្លួន៕