រតនគិរី៖ នាព្រឹកថ្ងៃទី៨ ខែឧសភា ឆ្នាំ២០២៦ ឯកឧត្តម គិត ទ្រី សមាជិកគណៈកម្មការទី១ នៃរដ្ឋសភា និងជាតំណាងរាស្ត្រមណ្ឌលខេត្តរតនគិរី បានអញ្ជើញចុះជួបសំណេះសំណាល និងពិនិត្យការអនុវត្តការងាររបស់រដ្ឋបាលឃុំចំនួន៣ ក្នុងស្រុកកូនមុំ រួមមាន ឃុំតាអង ឃុំត្រពាំងច្រេស និងឃុំត្រពាំងក្រហម ដើម្បីក្តាប់នូវវឌ្ឍនភាពការងារ និងបញ្ហាប្រឈមនានានៅមូលដ្ឋាន។

ក្នុងដំណើរការចុះជួបសំណេះសំណាលនេះ ក៏មានការអមដំណើរដោយ លោក មែ វាសនា អភិបាលរងស្រុកកូនមុំ លោក សាធ គន្ធា អធិការនគរបាលស្រុក លោក សុខ ណា មេបញ្ជាការផ្នែកសឹករងស្រុក ព្រមទាំងមន្ត្រីពាក់ព័ន្ធជាច្រើនរូបទៀត។

មានមតិសំណេះសំណាលក្នុងឱកាសនោះ ឯកឧត្តម គិត ទ្រី បានសម្តែងការកោតសរសើរចំពោះកិច្ចខិតខំប្រឹងប្រែងរបស់អាជ្ញាធរឃុំ ដែលបានសហការគ្នាយ៉ាងស្អិតរមួត ក្នុងការរក្សាសុវត្ថិភាព សន្តិសុខ និងសណ្តាប់ធ្នាប់សាធារណៈ។ ឯកឧត្តមបានកត់សម្គាល់ឃើញថា ការអភិវឌ្ឍក្នុងឃុំនានាមានសន្ទុះគួរឱ្យកត់សម្គាល់ ដែលជាផលវិជ្ជមានកើតចេញពីការយកចិត្តទុកដាក់របស់មន្ត្រីគ្រប់លំដាប់ថ្នាក់។

ឆ្លៀតក្នុងឱកាសនោះដែរ ឯកឧត្តម ក៏បានផ្តល់នូវអនុសាសន៍គន្លឹះសំខាន់ៗមួយចំនួន ដើម្បីពង្រឹងប្រសិទ្ធភាពការងារបន្ថែមទៀត ជាពិសេសលើការផ្តល់សេវារដ្ឋបាលជូនដល់ប្រជាពលរដ្ឋឱ្យបានកាន់តែល្អប្រសើរ ៕