(កំពង់ឆ្នាំង)៖ ឯកឧត្តមបណ្ឌិត ហ៊ឺ វីរៈ តំណាងរាស្ត្រមណ្ឌលខេត្តកំពង់ឆ្នាំង បានអញ្ជើញនាំយកបច្ច័យចំនួន ១,០០០ដុល្លារ ប្រគេនព្រះកុសលសត្ថា ឆៃ សៅចៅអធិការវត្តចន្ទសុរិយាក្រឡាញ់ ដើម្បីចូលរួមសាងសង់របង មណ្ឌលថែទាំមនុស្សចាស់វីរៈសុភា ស្ថិតក្នុងឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង។
ក្នុងឱកាសនោះ ឯកឧត្តមបណ្ឌិត បានសម្តែងនូវការកោតសរសើរ និងថ្លែងអំណរព្រះគុណចំពោះព្រះចៅអធិការវត្ត ដែលបានខិតខំកៀរគរសប្បុរសជន រួមចំណែកអភិវឌ្ឍវិស័យសាសនា និងសង្គមកិច្ច ជាពិសេសការកសាងមជ្ឈមណ្ឌលថែទាំមនុស្សវ័យចាស់នេះ សម្រាប់បម្រើប្រយោជន៍ជូនពលរដ្ឋក្នុងមូលដ្ឋាន។
គួរបញ្ជាក់ថា ក្រោយពិធីក្រុងពលីកាលពីខែកុម្ភៈ បច្ចុប្បន្នគម្រោងកំពុងសាងសង់របងព័ទ្ធជុំវិញ មុននឹងឈានដល់ការសាងសង់អគារស្នាក់នៅ ការិយាល័យ និងផ្នែកផ្សេងៗទៀត។
បន្តមកទៀត ឯកឧត្តមបណ្ឌិត ក៏បាននាំយកគ្រែអ្នកជំងឺ និងរទេះជនពិការ ទៅឧបត្ថម្ភជូនដល់មណ្ឌលសុខភាពឃុំតាជេស ផងដែរ។ ក្នុងឱកាសនោះ ឯកឧត្តម បានវាយតម្លៃខ្ពស់ចំពោះស្មារតីទទួលខុសត្រូវរបស់ក្រុមគ្រូពេទ្យ និងបានដាស់តឿនឱ្យបន្តផ្សព្វផ្សាយអំពីអត្ថប្រយោជន៍នៃ បណ្ណសមធម៌ និង បណ្ណងាយរងហានិភ័យ ដើម្បីឱ្យប្រជាពលរដ្ឋអាចទទួលបានសេវាគាំពារសុខភាពពីរាជរដ្ឋាភិបាលឱ្យបានទូលំទូលាយ និងមានប្រសិទ្ធភាព៕
