តំណាងរាស្ត្រមណ្ឌលខេត្តតាកែវ រួមមាន៖ លោកជំទាវ និន សាផុន ឯកឧត្តមបណ្ឌិត ម៉ុក ម៉ារ៉េត ឯកឧត្តម អ៊ិត សុខ លោកជំទាវ នូ សុវណ្ណនី និងឯកឧត្ដម គិន ណែត សមាជិកព្រឹទ្ធសភាភូមិភាគ៥ អមដំណើរដោយក្រុមការងារចលនាស្ត្រី នៃក្រុមការងារចុះមូលដ្ឋានខេត្តតាកែវ បានអញ្ជើញជាតំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ក្នុងពិធីជួបសំណេះសំណាលសួរសុខទុក្ខ និងនាំយកថវិកា សម្ភារៈ និង គ្រឿងឧបភោគបរិភោគឧបត្ថម្ភជូនក្រុមគ្រួសារវីរៈកងទ័ពជួរមុខចំនួន ៩០គ្រួសារ នៅស្រុកកោះអណ្តែត ខេត្តតាកែវ នាថ្ងៃទី៣០ ខែធ្នូ ឆ្នាំ២០២៥។  

នៅក្នុងពិធីសំណេះសំណាលនេះ លោកជំទាវ និន សាផុន បាននាំប្រសាសន៍ផ្តាំផ្ញើរបស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដែលជានិច្ចកាល សម្តេចតែងតែយកចិត្តទុកដាក់ និងគិតគូរចំពោះទុក្ខលំបាករបស់ក្រុមគ្រួសារវីរៈកងទ័ព និងការដឹងគុណចំពោះវីរភាពដ៏អង់អាចក្លាហានរបស់វីរៈកងទ័ព ដែលបានពលីជីវិត ដើម្បីបុព្វហេតុជាតិ និងប្រជាជន។

បន្ទាប់មក តំណាងរាស្ត្រខេត្តតាកែវ និងសមាជិកព្រឹទ្ធសភាភូមិភាគ៥ បានចែកជូនថវិកា និងសម្ភារៈដល់ក្រុមគ្រួសារវីរៈកងទ័ពជួរមុខចំនួន ៩០គ្រួសារ សរុបជាទឹកប្រាក់ចំនួន ១១,៧៩២,០០០រៀល ដែលចូលរួមឧបត្ថម្ភពី ឯកឧត្តមកិត្តិនីតិកោសលបណ្ឌិត ប៊ិន ឈិន ឯកឧត្តមបណ្ឌិត ស៊ូ ភិរិន្ទ និងឯកឧត្តម អ៊ុន វណ្ណា សមាជិកព្រឹទ្ធសភា ផងដែរ៕