ឯកឧត្តម ឡេង ប៉េងឡុង អគ្គលេខាធិការរដ្ឋសភា និងជាប្រធានគណៈកម្មការប្រឡងជ្រើសរើសមន្រ្តីកិច្ចសន្យា នាព្រឹកថ្ងៃទី២៣ ខែធ្នូ ឆ្នាំ២០២៥ បានអញ្ជើញដឹកនាំកិច្ចប្រជុំពិនិត្យពិភាក្សាលើដំណើរការនៃការ ត្រៀមប្រឡងជ្រើសរើសមន្រ្តីកិច្ចសន្យា សម្រាប់បម្រើការងារនៅក្នុ្ងអង្គភាពមួយចំនួននៃអគ្គលេខាធិការដ្ឋានរដ្ឋសភា។

កិច្ចប្រជុំនេះរៀបចំឡើងនៅវិមានរដ្ឋសភា ដោយមានការអញ្ជើញចូលរួមពីឯកឧត្ដម លោកជំទាវ លោក លោកស្រី ជាប្រធាន និងសមាជិកអនុគណៈកម្មការនានា ចំណុះឱ្យគណៈកម្មការប្រលងជ្រើសរើសមន្ត្រីកិច្ចសន្យា មានដូចជា អនុគណៈកម្មការផ្ដល់និងទទួលពាក្យសុំសិទ្ធិចូលប្រលង អនុគណៈកម្មការតាក់តែងវិញ្ញាសារប្រឡង និងកំណែ អនុគណៈកម្មការមេប្រយោគ និងអនុរក្ស និងអនុគណៈកម្មការផ្គត់ផ្គង់ និងហិរញ្ញវត្ថុ។

សូមជម្រាបថា អគ្គលេខាធិការដ្ឋានរដ្ឋសភា នៅពេលនេះមានគម្រោងជ្រើសរើសមន្ត្រីកិច្ចសន្យាចំនួន៣៥នាក់ ក្នុងនោះ៥នាក់ លើជំនាញ ផ្នែកសរសេរព័ត៌មាន កាត់តវីដេអូ រចនារូបភាព និងចំនួន៣០នាក់ទៀត សម្រាប់បម្រើការងារផ្នែកបច្ចេកវិទ្យាព័ត៌មាន និងគមនាគមន៍(IT)។ គិតមកដល់ពេលនេះ បន្ទាប់ពីធ្វើការជម្រុះវគ្គដំបូង (Short List) គឺនៅសល់បេក្ខជនចំនួន១០៩នាក់ ដែលនឹងត្រូវចូលរួមប្រឡង ទៅលើវិញ្ញាសារផ្នែកទ្រឹស្ដី និងការអនុវត្តជាក់ស្ដែង ព្រមទាំងសម្ភាសន៍ផ្ទាល់មាត់ នាពេលខាងមុខ៕