នាព្រឹកថ្ងៃទី២៥ ខែធ្នូ ឆ្នាំ២០២៤ និស្សិតមហាវិទ្យាល័យច្បាប់ នៃសាកលវិទ្យាល័យបញ្ញាសាស្ត្រកម្ពុជា ចំនួន២៥នាក់ បានធ្វេីទស្សនកិច្ចស្វែងយល់ពីតួនាទីភារកិច្ចរបស់រដ្ឋសភា ដែលបានទទួលស្វាគមន៍ និងផ្តល់បទឧទ្ទេសនាមដោយ លោកជំទាវ គ្រួច សំអាន ប្រធានស្តីទី គណៈកម្មការនីតិកម្ម និងយុត្តិធម៌ នៃរដ្ឋសភា និងសហការី។
លោកជំទាវ គ្រួច សំអាន បានបង្ហាញពីប្រវត្តិរដ្ឋសភាកម្ពុជាចាប់ពីឆ្នាំ១៩៤៧ មកដល់បច្ចុប្បន្ន និងបានបង្ហាញតួនាទី និងភារកិច្ចរបស់រដ្ឋសភា ដែលជាអង្គការដែលមានអំណាចនីតិប្បញ្ញត្តិ ហើយបំពេញភារកិច្ចរបស់ខ្លួនដូចបានកំណត់ក្នុងរដ្ឋម្មនុញ្ញ និងច្បាប់ជាធរមាន។ តំណាងរាស្ត្រមានតួនាទីក្នុងការធ្វេីច្បាប់ តាមដានការអនុវត្តច្បាប់ ភាពជាតំណាងរបស់ប្រជាជាតិ និងតួនាទីការទូតសភា។ ជាមួយគ្នានោះ លោកជំទាវ បានបង្ហាញយ៉ាងលំអិតពីនីតិវិធី និងការអនុម័តច្បាប់នៅរដ្ឋសភា ការបញ្ជូនទៅព្រឹទ្ធសភាពិនិត្យនិងឱ្យយោបល់ និងនីតិវិធីនៃការប្រកាសឱ្យប្រេីច្បាប់។
កញ្ញា មុនីលក្ខណ៍ សោគន្និកា តាងនាមសាកលវិទ្យាល័យបញ្ញាសាស្ត្រកម្ពុជា និងមហាវិទ្យាល័យច្បាប់ បានគោរពថ្លែងអំណរគុណដ៏ខ្ពង់ខ្ពស់បំផុតចំពោះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ដែលបានអនុញ្ញាតឱ្យមាននូវដំណើរទស្សនកិច្ចសិក្សាស្វែងយល់អំពី តួនាទី និងភារកិច្ចរបស់រដ្ឋសភា និងបានថ្លែងអំណរគុណចំពោះ លោកជំទាវ គ្រួច សំអាន ប្រធានស្តីទីគណៈកម្មការ នីតិកម្ម និងយុត្តិធម៌ នៃរដ្ឋសភា ដែលបានចំណាយពេលវេលាដ៏មានតម្លៃជាអធិបតី និងផ្តល់បទឧទ្ទេសនាមដល់ក្រុមនិស្សិត និងសូមអរគុណអគ្គលេខាធិការដ្ឋានរដ្ឋសភា ដែលបានសម្របសម្រួល និងទទួលបដិសណ្ឋារកិច្ចយ៉ាងកក់ក្តៅនាពេលនេះ៕
