ឯកឧត្តមបណ្ឌិត ឈាង វណ្ណារិទ្ធ ប្រធានក្រុមទីប្រឹក្សារដ្ឋសភា បានអញ្ជើញចូលរួមជាអ្នកសម្របសម្រួល ក្នុងកិច្ចពិភាក្សាស្ដីពី ទំនាក់ទំនងអាស៊ាន- ចិន ដើម្បីឆ្ពោះទៅរកការអភិវឌ្ឍប្រកបដោយចីរភាព និងមានភាពធន់ ដែលមានវាគ្មិនចូលរួមមកពីវិស័យឯកជន និងវិស័យសាធារណៈ នៅក្នុងកម្មវិធី China-ASEAN Roundtable 2024 ដែលរៀបចំដោយ KSI និង សាកលវិទ្យាល័យ Camtech។

កិច្ចពិភាក្សានេះមានខ្លឹមសារសំខាន់ៗដូចជា យើងត្រូវពង្រឹងបន្ថែមទៀតនូវការតភ្ជាប់សេដ្ឋកិច្ចរវាងចិន និងអាស៊ាន ទាំងផ្នែកហេដ្ឋារចនាសម្ព័ន្ធរឹង និងហេដ្ឋារចនាសម្ព័ន្ធទន់ ពង្រឹងបន្ថែមនូវទំនាក់ទំនងពាណិជ្ជកម្ម ការវិនិយោគ ការផ្លាស់ប្ដូរនូវបច្ចេកវិទ្យា បច្ចេកទេស និងនវានុវត្តន៍ និងជំរុញការអភិវឌ្ឍថាមពលបៃតង ដើម្បីជំរុញការប្រើប្រាស់សូឡា និងថាមពលដើរដោយខ្យល់។ ប្រទេសចិន គឺជាប្រទេសដែលកំពុងនាំមុខក្នុងផ្នែកសេដ្ឋកិច្ច និងបច្ចេកវិទ្យាបៃតង។ ដូចនេះ ប្រទេសកម្ពុជាគួរពង្រឹងទៅលើហិរញ្ញប្បទានបៃតងផងដែរ។ កិច្ចពិភាក្សានេះក៏បានលើកឡើងអំពីការពង្រឹងកិច្ចសហប្រតិបត្តិការលើ start-up និងតភ្ជាប់ start-up រវាងអាស៊ាន និងចិន ឲ្យកាន់តែមានភាពស៊ីជម្រៅ។ លើសពីនេះទៀត សហគ្រិនភាព និងនវានុវត្តន៍ គឺជាវិស័យដែលអាស៊ាន និងចិនគួរតែយកចិត្តទុកដាក់បន្ថែម ដើម្បីពង្រឹងនូវការផ្លាស់ប្ដូរគំនិត និងបទពិសោធផ្សេងៗទាក់ទងនឹងសហគ្រិនភាព និងនវានុវត្តន៍នេះ។