នាព្រឹកថ្ងៃទី៥ ខែវិច្ឆិកា ឆ្នាំ២០២៤ គណៈប្រតិភូរដ្ឋសភាកម្ពុជា ដឹកនាំដោយឯកឧត្តម ឃុត ចាន់ដារ៉ា សមាជិកគណៈកម្មការទី៩ នៃរដ្ឋសភា បានអញ្ជើញទៅ ចូលរួមកិច្ចពិភាក្សាតុមូលស្តីពីបរិយាកាស និងទឹក របស់ក្រុមប្រឹក្សាទឹកនៃសភាអាស៊ី (AAWC)  ក្រោមមូលបទ «ទឹកសម្រាប់វិបុលភាពរួម» សហការរៀបចំ ដោយក្រុមប្រឹក្សាទឹកអាស៊ី (AWC) និងសាជីវកម្មធនធានទឹកកូរ៉េ (K-Water)

ដែលប្រព្រឹត្តទៅចាប់ពី ថ្ងៃទី៥ ដល់ថ្ងៃទី៧ ខែវិចិ្ឆកា ឆ្នាំ២០២៤ នៅវិមានរដ្ឋសភា នៃសាធារណរដ្ឋកូរ៉េ។

ក្នុងឱកាសនៃកិច្ចប្រជុំពិភាក្សាតុមូលនេះ ក៏មានកិច្ចប្រជុំនៃក្រុមប្រឹក្សាភិបាល នៃក្រុមប្រឹក្សាទឹកនៃសភាអាស៊ី (AAWC) ដោយមានរបៀបវារៈចំនួន៤ ក្នុងនោះរួមមាន ការបោះឆ្នោតជ្រើសតាំងអនុប្រធានថ្មី១រូប ហិរញ្ញករ១រូប និងការបោះឆ្នោតទទួលសមាជិកថ្មីចំនួន៧រូប។ ឯកឧត្តម ឃុត ចាន់ដារ៉ា ក៏ត្រូវបានជ្រើសតាំង ជាសមាជិកថ្មីមួយរូបផងដែរ។

កិច្ចពិភាក្សាតុមូលនេះ បានផ្តោតសំខាន់លើការសិក្សាស្រាវជ្រាវលើលិខិតបទដ្ឋានគតិយុត្តិពាក់ព័ន្ធនឹងការគ្រប់គ្រងទឹក  ពង្រឹងកិច្ចសហប្រតិបត្តិការរវាងសភា សមាជិក AAWC និងជំរុញដំណោះស្រាយនានា ដើម្បីការប្រើប្រាស់ទឹកប្រកបដោយគុណភាព សុវត្ថិភាព និង និរន្តភាព សំដៅការសម្រេចបាន គោលដៅអភិវឌ្ឍប្រកបដោយចិរភាពសម្រាប់តំបន់៕