ជាការស្វាគមន៍ និងអបអរសាទរចំពោះលទ្ធផលនៃដំណើរទស្សនកិច្ចផ្លូវការរបស់គណៈប្រតិភូជាន់ខ្ពស់រដ្ឋសភាកម្ពុជា ដែលបំពេញទស្សនកិច្ចផ្លូវការ និងមិត្តភាពនៅប្រទេសថៃ ឯកឧត្តម វ៉ាន់មូហាម៉ាត់ ណ័រ មៈថា ប្រធានសភាតំណាងរាស្រ្ត និងជាប្រធានរដ្ឋសភាប្រទេសថៃ បានរៀបចំពិធីលៀងសាយភោជន៍ជូនគណៈប្រតិភូជាន់ខ្ពស់រដ្ឋសភាកម្ពុជា ដែលដឹកនាំដោយ សម្តេចមហារដ្ឋសភាធិការធិបតី ឃួន សុដារី នារាត្រីថ្ងៃទី១១ ខែកក្កដា ឆ្នាំ២០២៤។
ឯកឧត្តម វ៉ាន់មូហាម៉ាត់ ណ័រ មៈថា បានវាយតម្លៃខ្ពស់លើលទ្ធផលនៃជំនួបពិភាក្សាទ្វេភាគីរវាងរដ្ឋសភាប្រទេសទាំងពីរកាលពីរសៀលថ្ងៃនេះ ដោយសម្រេចបានផ្លែផ្កាគួរជាទីមោទនៈ។ ក្រោមការពិភាក្សា ផ្លាស់ប្តូរទស្សនៈ មតិយោបល់ និងបទពិសោធជាក់ស្តែង រវាងគ្នាទៅវិញទៅមក ប្រកបដោយភាពស្និទ្ធស្នាល ត្រង់ទៅត្រង់មក និងដោយភាពជឿទុកចិត្តលើគ្នាទៅវិញទៅមក គឺជាយន្តការដ៏មានសារៈសំខាន់ និងជាមូលដ្ឋានគ្រឹះដ៏រឹងមាំក្នុងការបន្តពង្រឹងពង្រីក និងលើកកម្ពស់នូវចំណងមិត្តភាព សាមគ្គីភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងរដ្ឋសភានៃព្រះរាជាណាចក្រកម្ពុជា និងរដ្ឋសភានៃព្រះរាជាណាចក្រថៃ។
ជាមួយគ្នានេះ សម្តេចរដ្ឋសភាធិបតី បានថ្លែងអំណរគុណយ៉ាងជ្រាលជ្រៅដល់ ឯកឧត្តមប្រធានរដ្ឋសភា និងសមាជិកសមាជិការដ្ឋសភាថៃទាំងអស់ រាជរដ្ឋាភិបាល និងប្រជាជនថៃ ដែលបានទទួលស្វាគមន៍ ធ្វើបដិសណ្ឋារកិច្ចយ៉ាងកក់ក្តៅជាទីបំផុតជូនដល់គណៈប្រតិភូរដ្ឋសភាកម្ពុជា។ សម្តេចប្រធានរដ្ឋសភា បានបញ្ជាក់ពីមនោសញ្ចេតនាដ៏ជ្រាលជ្រៅនៃទំនាក់ទំនងជាប្រពៃណី ដែលមានតាំងពីយូរលង់ណាស់មកហើយ។ សម្តេចបានសម្តែងសុទិដ្ឋិនិយម និងជំនឿយ៉ាងមុតមាំថា ក្រោមកិច្ចសហប្រតិបត្តិការដ៏ស្អិតល្មួតរវាងរដ្ឋសភា រាជរដ្ឋាភិបាល និងប្រជាជនទាំងពីរ នឹងសម្រេចបាននូវសុខដុមរមនា និងវិបុលភាព ជូនប្រជាពលរដ្ឋយើងទាំងសងខា ទាំងពេលបច្ចុប្បន្ន និងអនាគត ៕