ក្នុងនាមជាម្ចាស់ផ្ទះរៀបចំមហាសន្និបាតអន្តរសភាអាស៊ាន លើកទី៤៣ ហៅកាត់ថា (AIPA43) ចាប់ពីថ្ងៃទី២០ ដល់ថ្ងៃទី២៥ ខែវិច្ឆិកា ឆ្នាំ២០២២ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា និងជាប្រធានអន្តរសភាអាស៊ាន លើកទី៤៣ នៅយប់ថ្ងៃទី២០ ខែវិច្ឆិកា ឆ្នាំ២០២២ បានអញ្ជើញជាអធិបតីភាពដ៏ខ្ពស់ខ្ពង់ដឹកនាំកិច្ចប្រជុំគណៈកម្មាធិការប្រតិបត្តិ AIPA  នៅសណ្ឋាគារសុខាភ្នំពេញ។

សមាសភាពគណៈប្រតិភូអាយប៉ាចូលរួមក្នុងកិច្ចប្រជុំគណៈកម្មាធិការប្រតិបត្តិនាពេលនេះមាន ឯកឧត្តម Pehin Dato Abdul Rahman Taib ប្រធានរដ្ឋសភាប្រ៊ុយណេដារូស្សាឡឹម ឯកឧត្តមបណ្ឌិត Fadli Zon ប្រធានគណៈកម្មការសហប្រតិបត្តិការអន្តរសភា នៃសាធា- រណរដ្ឋឥណ្ឌូនេស៊ី និងលោក Putu Supadma Rudana សមាជិករដ្ឋសភា និងជាអនុប្រធានគណៈកម្មការសហប្រតិបត្តិការអន្តរសភា ឥណ្ឌូនេស៊ី ឯកឧត្តមបណ្ឌិត Xaysomphone PHOMVIHANE ប្រធានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ ឯកឧត្តម Raymond Democrito Cañete Mendoza ប្រធានសភាហ្វីលីពីន ឯកឧត្តម TAN Chuan-Ji ប្រធានរដ្ឋសភាសឹង្ហបុរី  ឯកឧត្តម  Chuan LEEKPAI ប្រធានរដ្ឋសភានៃព្រះរាជាណាចក្រថៃ ឯកឧត្តម VUONG DINH HUE ប្រធានរដ្ឋសភា នៃសាធារណរដ្ឋ សង្គមនិយមវៀតណាម និងប្រតិភូកម្ពុជាដឹកនាំដោយកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា។

ជាកិច្ចចាប់ផ្តើម សម្តេចអគ្គមហាពញាចក្រី ហេង សំរិន ប្រធានរដ្ឋសភា បានប្រកាសជ្រើសតាំង ឯកឧត្តម  Chuan LEEKPAI ប្រធាន រដ្ឋសភានៃព្រះរាជាណាចក្រថៃ ជាអនុប្រធានដឹកនាំកិច្ចប្រជុំគណៈកម្មាធិការប្រតិបត្តិអាយប៉ា បានធ្វើការពិភាក្សា និងអនុម័តលើកម្មវិធី សកម្មភាពសម្រាប់មហាសន្និបាតអាយប៉ាលើកទី៤៣ មានដូចជា៖

១-កម្មវិធីសកម្មភាពសម្រាប់មហាសន្និបាតអាយប៉ាលើកទី៤៣

២-របៀបវារៈសម្រាប់កិច្ចប្រជុំតាមគណៈកម្មការទាំង៦ នៃមហាសន្និបាតអាយប៉ា លើកទី៤៣ ដែលរួមមាន កិច្ចប្រជុំគណៈកម្មាធិការ សមាជិកសភាស្រ្តី កិច្ចប្រជុំសមាជិកសភាវ័យក្មេងអាយប៉ា កិច្ចប្រជុំគណៈកម្មាធិការនយោបាយ កិច្ចប្រជុំគណៈកម្មាធិការសេដ្ឋកិច្ច កិច្ចប្រជុំគណៈកម្មាធិការសង្គមកិច្ច កិច្ចប្រជុំគណៈកម្មាធិការរៀបចំ កិច្ចប្រជុំគណៈកម្មាធិការកិច្ចពិភាក្សាជាមួយសភាសង្កេតការណ៍ កិច្ចប្រជុំរវាងប្រតិភូអាយប៉ា និងអគ្គលេខាធិការអាស៊ាន កិច្ចប្រជុំគណៈកម្មាធិការបូកសរុប។

៣- ការសម្រេចអំពីកាលបរិច្ឆេទ និងទីកន្លែងសម្រាប់មហាសន្និបាតអាយប៉ាលើកទី៤៤។

នៅក្នុងកិច្ចប្រជុំគណៈកម្មាធិការប្រតិបត្តិនេះដែរ ក៏មានការអនុម័តបញ្ចូលសភានៃប្រទេសនេប៉ាល់ សភានៃប្រទេសអាហ្សែបៃហ្សង់ និង សភាសហរដ្ឋអាមេរិក ជាសមាជិកសង្កេតការណ៍អន្តរសភាអាស៊ាន ចាប់ពីមហាសន្និបាតអាយប៉ាលើកទី៤៣ នេះតទៅ។

ដោយឡែក របៀវារៈបន្ទាន់ដែលស្នើដោយឥណ្ឌូនេស៊ី ស្តីពីការជម្រុញឱ្យមានការអនុវត្តក្រមប្រតិបត្តិ៥ចំណុច របស់អាស៊ាន ចំពោះ ដំណោះស្រាយនៅមីយ៉ាន់ម៉ា គណៈកម្មាធិការប្រតិបត្តិបានសម្រេចបញ្ជូនទៅឱ្យគណៈកម្មាធិការជំនាញនយោបាយ ដើម្បីជជែកពិភាក្សា នៅក្នុងកិច្ចប្រជុំគណៈកម្មាធិការនយោបាយ នាថ្ងៃទី២២ ខែវិច្ឆិកា ខាងមុខ។

សូមបញ្ជាក់ថាអន្តរសភាអាស៊ាន (AIPA) ជាវេទិកាសភាបណ្ដាប្រទេសជាសមាជិកអាស៊ានដែលបានប្រមូលផ្តុំនូវមតិយោបល់ ទស្សនៈ​របស់​តំណាងពលរដ្ឋ ក្នុងការលើកកម្ពស់យន្តការសភា ក្រោមចក្ខុវិស័យទូលំទូលាយ និងកិច្ចសហប្រតិបត្តិការជិតស្និទ្ធ ដោះស្រាយបញ្ហា​រួម ដែលប៉ះពាល់ដល់តំបន់អាស៊ីអាគ្នេយ៍ ក៏ដូចជាពិភពលោក ឱ្យមានសន្តិសុខ ស្ថិរភាព និងវិបុលភាព ប្រកដោយចីរភាព។

សមាជិករបស់ AIPA រួមមាន ប្រទេសប្រ៊ុយណេដារូស្សាឡាម កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបុរី ថៃ និង ប្រទេសវៀតណាម ៕

អត្ថបទ និងរូបភាព ដោយនាយកដ្ឋានព័ត៌មាន