ទំព័រមុខ » ព័ត៌មាន » ព័ត៌មានប្រចាំថ្ងៃ » ឯកឧត្តម ឈាង វុន បានដឹកនាំកិច្ចប្រជុំជាមួយតំណាងរដ្ឋាភិបាល ដើម្បីពិនិត្យពិភាក្សាលើសេចក្តីព្រាងច្បាប់ចំនួនពីរ
ឯកឧត្តម ឈាង វុន បានដឹកនាំកិច្ចប្រជុំជាមួយតំណាងរដ្ឋាភិបាល ដើម្បីពិនិត្យពិភាក្សាលើសេចក្តីព្រាងច្បាប់ចំនួនពីរ
រៀបរៀងដោយ ៖​ NA1472 ​ នៅថ្ងៃទី (7/21/2022 7:23:45 PM )

ឯកឧត្ដម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នៅព្រឹកថ្ងៃទី២១ ខែកក្កដា ឆ្នាំ២០២២ បានដឹកនាំសហការីក្នុងគណៈកម្មការ និងសមាជិក សមាជិកាគណៈកម្មការជំនាញនានា នៃរដ្ឋសភា ជួបប្រជុំជាមួយតំណាងរដ្ឋាភិបាល ដឹកនាំដោយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅវិមានរដ្ឋសភា ដើម្បីពិនិត្យសិក្សា លើសេចក្តីព្រាងច្បាប់ចំនួនពីរ រួមមាន៖ ១-សេចក្តីព្រាងច្បាប់ស្តីពីការគ្រប់គ្រងចំណូលមិនមែនសារពើពន្ធ និងទី២- សេចក្តីព្រាងច្បាប់ស្តីពី ការអនុម័តយល់ព្រមលើ៖

២.១-កិច្ចព្រមព្រៀងរវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃតំបន់សេដ្ឋកិច្ចពិសេសម៉ាកាវ នៃសាធារណរដ្ឋ ប្រជាមានិតចិន ស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាង ពន្ធ។

២.២-កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋតួកគី ស្តីពីការចៀសវាងការយកពន្ធ ត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។

ឯកឧត្តម ឈាង វុន បានមានប្រសាសន៍ថា កិច្ចប្រជុំនាថ្ងៃនេះគឺចង់បានការបំភ្លឺនូវចំណុចមួយចំនួននៅក្នុងសេចក្តីព្រាងច្បាប់ទាំងពីរ ខាងលើពីតំណាងរដ្ឋាភិបាល ដោយសារគណៈកម្មការបានពិនិត្យសិក្សាផ្ទៃក្នុងរួចហើយ និងនៅមានការមន្ទិលសង្ស័យទៅលើចំណុច មួយចំនួន រួមទាំងមានការកែសម្រួលអក្ខរាវិរុទ្ធខ្លះៗ អោយស្របទៅតាមអត្ថបទច្បាប់ មុននឹងដាក់ជូនគណៈកម្មាធិការអចិន្រ្តៃយ៍ នៃ រដ្ឋសភា ពិនិត្យសម្រេចដាក់ចូលក្នុងរបៀបវារៈសម័យប្រជុំពេញអង្គរដ្ឋសភានាពេលខាងមុខ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានមានប្រសាសន៍ថា សេចក្តីព្រាងច្បាប់ស្តីពីការគ្រប់គ្រងចំណូលមិនមែនសារពើពន្ធ ត្រូវបានតាក់តែងឡើង ក្នុងគោលបំណងគ្រប់គ្រងចំណូលមិនមែនសារពើពន្ធ ដែលជាចំណូលថវិកាជាតិប្រកបដោយ ប្រសិទ្ធភាព សក្តិសិទ្ធិភាព តម្លាភាព គណនេយ្យភាព និងសង្គតិភាពដោយកំណត់ក្របខ័ណ្ឌច្បាប់ ស្ថាប័នជាគោល យន្តការ វិធាន និងនិតិវិធី នៃការគ្រប់គ្រងការប្រមូលចំណូលមិនមែនសារពើពន្ធគ្រប់ប្រភេទសំដៅចូលរួមចំណែកបម្រើឧត្តមប្រយោជន៍នៃការអភិវឌ្ឍសេដ្ឋកិច្ច និង សង្គមនៃព្រះរាជាណាចក្រកម្ពុជា ស្របតាមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ និងយុទ្ធសាស្រ្តកៀរគរចំណូលរយៈពេល មធ្យមឆ្នាំ២០១៤-២០១៨ និងយុទ្ធសាស្រ្តកៀរគរចំណូលឆ្នាំ២០១៩-២០២៣ របស់រាជរដ្ឋាភិបាល។

ដោយឡែកកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃតំបន់សេដ្ឋកិច្ចពិសេសម៉ាកាវ នៃសាធារណរដ្ឋ ប្រជាមានិតចិន ស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាង ពន្ធ។ និងកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋតួកគី ស្តីពីការចៀសវាងការយក ពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូលត្រូវបានតាក់តែងឡើង ក្នុងគោលបំណងឈានទៅសម្រេច កិច្ចព្រមព្រៀងស្តីពីការលុបបំបាត់ការយកពន្ធត្រួតគ្នា ពាក់ព័ន្ធនឹងពន្ធលើប្រាក់ចំណូល ដោយគ្មានការបង្កើតឱកាសសម្រាប់ការមិនយក ពន្ធ ឬការកាត់បន្ថយពន្ធតាមរយៈការគេចវេសពន្ធដា ឬការចៀសវាងពន្ធ (រួមទាំងតាមរយៈនៃការរៀបចំក្នុងការកេងចំណេញពីសន្ធិ- សញ្ញា ដើម្បីទទួលបានការអនុគ្រោះនានាក្នុងកិច្ចព្រមព្រៀងនេះ សម្រាប់ជាផលប្រយោជន៍ដោយប្រយោលនិវាសជននៃយុត្តាធិការទីបី) ដើម្បីបន្តបង្កើតទំនាក់ទំនងសេដ្ឋកិច្ច ពង្រឹងកិច្ចសហប្រតិបត្តិការក្នុងផ្នែកពន្ធដា រវាងរាជរដ្ឋាភិបាល នៃព្រះរាជាណាចក្រកម្ពុជា និង រដ្ឋាភិបាលនៃតំបន់ពិសេសម៉ាកាវ នៃសាធារណរដ្ឋប្រជាមានិតចិន ក៏ដូចជារដ្ឋាភិបាលនៃប្រទេសតួគី ៕

អត្ថបទ និងរូបភាព ដោយនាយកដ្ឋានព័ត៌មាន