ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១នៃរដ្ឋសភា នៅព្រឹកថ្ងៃទី១២ ខែឧសភា ឆ្នាំ២០២២ បានអនុញ្ញាតអោយ ឯកឧត្តម Vincent Eblé សមាជិកព្រឹទ្ធសភាបារាំង និងជាប្រធានក្រុមអន្តរសភាមិត្តភាពបារាំង-កម្ពុជា ចូលជួបសម្តែងការគួរសម និងពិភាក្សា ការងារនៅវិមានរដ្ឋសភា។

នៅក្នុងឱកាសនោះ ឯកឧត្តម Vincent Eblé បានមានប្រសាសន៍ថា ក្រុមមិត្តភាពសភាបារាំង-កម្ពុជា បានបង្កើតឡើងតាំងពីឆ្នាំ១៩៩១ រហូតមកទល់បច្ចុប្បន្នដោយជ្រើសរើសចេញពីគណបក្សដែលមានអាសនៈនៅក្នុងរដ្ឋសភាបារាំង ហើយក៏មានផ្លាស់ប្ដូរទស្សនកិច្ចទៅវិញ- ទៅមករវាងរដ្ឋសភានៃប្រទសទាំងពីរកម្ពុជា-បារាំង ដើម្បីភ្ជាប់ និងជំរុញនូវទំនាក់ទំនងកិច្ចប្រតិបត្តិការ រវាងស្ថាប័ននីតិប្បញ្ញត្តិ ក៏ដូចជា ស្ថាប័ននីតិប្រតិបត្តិនៃប្រទេសទាំងពីរ។

ឯកឧត្តមបានបន្តថា នៅក្នុងរយៈពេលចុងក្រោយនេះ ដោយសាតែការរីករាលដាលនៃជំងឺកូវីដ-១៩ ធ្វើអោយទំនាក់ទំនងនៃប្រទេស ទាំងពីរបានផ្អាកមួយរយៈ។ បន្ទាប់ពីជំងឺកូវីដ១៩បានថមថយ ឯកឧត្ដមបានដឹកនាំគណៈប្រតិភូសមាជិកព្រឹទ្ធសភាបារាំង ក៏ដូចជាក្រុម អន្តរសភាមិត្តភាពបារាំង-កម្ពុជា មកធ្វើទស្សនកិច្ចនៅកម្ពុជានាពេលនេះ គឺមានគោលបំណងពង្រឹងឡើងវិញ នូវចំណងមិត្តភាពកិច្ចសហ- ប្រតិបត្តិការលើគ្រប់វិស័យរវាងស្ថាប័ននីតិបញ្ញត្តិនិងនីតិប្រតិបត្តិនៃប្រទេសទាំងពីរអោយកាន់តែល្អប្រសើរថែមទៀត។

ឯកឧត្តម Vincent Eblé ក៏បានថ្លែងកោតសរសើរផងដែរថា ប្រទេសកម្ពុជាក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តីនៃព្រះរាជាណាចក្រកម្ពុជា មានការរីកចម្រើនគួរជាទីមោទនៈ។

ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍ថា ជំនួសមុខអោយ សម្តេចអគ្គមហាពញាចក្រី ហេង សំរិន ប្រធានរដ្ឋសភា និងក្នុងនាមឯកឧត្តមផ្ទាល់ ឯកឧត្តមសូមសំដែងការស្វាគមន៍យ៉ាងកក់ក្តៅជូនចំពោះ ឯកឧត្តម Vincent Eblé សមាជិកព្រឹទ្ធសភាបារាំង និងជាប្រធានក្រុមអន្តរសភាមិត្តភាពបារាំង-កម្ពុជា និងប្រតិភូព្រឹទ្ធសភាបារាំងទាំងអស់ ដែលបានអញ្ជើញមកបំពេញទស្សនកិច្ចផ្លូវការ នៅប្រទេសកម្ពុជានាពេលនេះ។

ឯកឧត្តមកិត្តិសេដ្ឋាបណ្ឌិតបានបន្ថែមថា ទស្សនៈកិច្ចរបស់គណៈប្រតិភូនាពេលនេះនឹងរួមចំណែករឹតនូវចំណងមិត្តភាព សាមគ្គីភាព និង កិច្ចសហប្រត្តិការ លើកិច្ចការវប្បធម៌ និងសេដ្ឋកិច្ចនៃសភាប្រទេសទាំងពីរកម្ពុជា បារាំង ផងដែរ។

ឯកឧត្តមអនុប្រធានទី១រដ្ឋសភា ក៏បានសម្តែងការសោកស្តាយ ចំពោះមរណភាពរបស់ឯកឧត្តមប្រធានសភានិយាយភាសាបារាំង នៃ ប្រទេសកូឌីវ័រ ដែលបានទទួលមរណៈភាពកាលពីថ្ងៃទី៧ខែឧសភា ឆ្នាំ២០២២ កន្លងមក ។

ឯកឧត្តមកិត្តិសេដ្ឋាបណ្ឌិត ជាម យៀប ក៏បានជម្រាបជូនគណៈប្រតិភូផងដែរ ពីជោគជ័យដែលរាជរដ្ឋាភិបាលកម្ពុជា បានអនុវត្តន៍ យុទ្ធសាស្រ្តចាក់ស្រោចវ៉ាក់សាំងការពារកូវីដ១៩ ជូនដល់ប្រជាពលរដ្ឋទូទាំងប្រទេស ដែលរហូតមកដល់ពេលនេះ ប្រទេសកម្ពុជាកំពុង ដំណើរការជីវភាពរស់នៅរបស់ប្រជាពលរដ្ឋ និងសេដ្ឋកិច្ចសង្គមឡើងវិញលើគ្រប់វិស័យ។

ឯកឧត្តមអនុប្រធានទី១រដ្ឋសភា បានសំនូមពរដល់ ឯកឧត្តម Vincent Eblé សមាជិកព្រឹទ្ធសភាបារាំង និងជាប្រធានក្រុមអន្តរសភា មិត្តភាពបារាំង-កម្ពុជា ស្នើឲ្យមានការចុះអនុស្សរណៈយោគយល់គ្នារវាងរដ្ឋសភានៃប្រទេសទាំងពីរ កម្ពុជា បារាំង ដើម្បីឲ្យមានកិច្ចសហ- ប្រត្តិការគ្នាកាន់តែល្អ និងគាំទ្រគ្នាទៅវិញទៅមកនៅក្នុងកិច្ចប្រជុំក្របខណ្ឌអន្តរជាតិនានា៕

អត្ថបទ និងរូបភាព ដោយនាយកដ្ឋានព័ត៌មាន