ឯកឧត្តម ឡេង ប៉េងឡុង អគ្គលេខាធិការរដ្ឋសភា នៅព្រឹកថ្ងៃទី១១ ខែមេសា ឆ្នាំ២០២២នេះ បានដឹកនាំកិច្ចប្រជុំពិភាក្សាការងារ ដើម្បី ត្រៀមរៀបចំទទួលដំណើរទស្សនកិច្ចរបស់ ឯកឧត្តម អំ បឺរឡា (OM BIRLA) ប្រធានសភាជាន់ទាប (រដ្ឋសភា) នៃសាធារណរដ្ឋឥណ្ឌា និងគណៈប្រតិភូ ដែលនឹងអញ្ជើញមកបំពេញទស្សនកិច្ចជាផ្លូវការ និងមិត្តភាព នៅព្រះរាជាណាចក្រកម្ពុជា ចាប់ពីថ្ងៃទី២១ ដល់ថ្ងៃទី២៤ ខែមេសា ឆ្នាំ២០២២ខាងមុខ។
កិច្ចប្រជុំនេះ ធ្វើឡើងនៅវិមានរដ្ឋសភា ដោយមានការចូលរួមពីឯកឧត្តម អស់លោកតំណាងក្រសួងពាក់ព័ន្ធ ឯកឧត្តមអគ្គលេខាធិការរង ថ្នាក់ដឹកនាំ និងមន្រ្តីពាក់ព័ន្ធនៃអគ្គលេខាធិការដ្ឋានរដ្ឋសភាជាច្រើនរូប។
ឯកឧត្តម ឡេង ប៉េងឡុង អគ្គលេខាធិការរដ្ឋសភា បានមានប្រសាសន៍ថា គោលបំណងនៃដំណើរទស្សនកិច្ចរបស់គណៈប្រតិភូសភា ជាន់ទាបនៃសាធារណរដ្ឋឥណ្ឌា ដឹកនាំដោយ ឯកឧត្តម អំ បឺរឡា មកកាន់ព្រះរាជាណាចក្រកម្ពុជានាពេលខាងមុខ មានគោលបំណង ចម្បងចំនួនពីរគឺ ទី១-អបអរសាទរ និងលើកតម្កើងនូវទំនាក់ទំនងការទូតខួបលើកទី៧០ឆ្នាំ រវាងប្រទេសទាំងពីរសាធារណរដ្ឋឥណ្ឌា និង ព្រះរាជាណាចក្រកម្ពុជា។ និងទី២-ឯកឧត្ដមប្រធានសភាជាន់ទាប នៃសាធារណរដ្ឋឥណ្ឌា គ្រោងនឹងយាង ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ទៅបំពេញព្រះរាជទស្សនកិច្ចជាផ្លូវរដ្ឋ និងមិត្តភាព នៅ សាធារណរដ្ឋឥណ្ឌានាពេលខាងមុខ។
ឯកឧត្តមអគ្គលេខាធិការរដ្ឋសភា ក៏បានជម្រាបជូនដល់តំណាងក្រសួងពាក់ព័ន្ធ សូមជួយសហការទៅតាមតួនាទី និងភារកិច្ចរបស់ខ្លួន ក្នុងការធ្វើបដិសណ្ឋារកិច្ចរៀបចំការការពារសុវត្ថិភាពជូនគណៈប្រតិភូឱ្យទទួលបានជោគជ័យ។
នៅក្នុងឱកាសនេះដែរ តំណាងក្រសួងពាក់ព័ន្ធ ក៏បានផ្តល់នូវមតិយោបល់ល្អៗពាក់ព័ន្ធនឹងកិច្ចសហប្រតិបត្តិការ ក្នុងការបម្រើជូនដំណើរ ទស្សនកិច្ចនេះឱ្យប្រព្រឹត្តទៅប្រកបដោយផ្លែផ្កា។
ឯកឧត្តម ឡេង ប៉េងឡុង បានថ្លែងអំណរគុណដល់តំណាងក្រសួងពាក់ព័ន្ធ និងអ្នកចូលរួមក្នុងកិច្ចប្រជុំទាំងអស់ ដែលបានផ្ដល់មតិ យោបល់ល្អៗក្នុងការធ្វើកិច្ចសហប្រតិបត្តិការ ដើម្បីត្រៀមរៀបចំទទួលដំណើរទស្សនកិច្ចរបស់គណៈប្រតិភូសភាជាន់ទាប នៃសាធារណ- រដ្ឋឥណ្ឌាឱ្យទទួលបានជោគជ័យ៕
អត្ថបទ និងរូបភាព ដោយនាយកដ្ឋានព័ត៌មាន