គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ដឹកនាំដោយ ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការ បានប្រជុំពិភាក្សាផ្ទៃក្នុងគណៈកម្មការ ដើម្បីពិនិត្យសិក្សាសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀង រវាងរាជរដ្ឋាភិ- បាលនៃព្រះរាជាណាចក្រកម្ពុជា និងរដ្ឋាភិបាលនៃតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន ស្តីពីការចៀសវាងការ យកពន្ធត្រួតគ្នា និងបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល នៅព្រឹកថ្ងៃទី១៧ ខែកញ្ញា ឆ្នាំ២០១៩ នៅវិមានរដ្ឋសភា។

ឯកឧត្តមបណ្ឌិតរដ្ឋ ជាម យៀប បានមានប្រសាសន៍នៅក្នុងកិច្ចប្រជុំនាពេលនេះថា សេចក្តីព្រាងច្បាប់ស្តីពីការអនុម័តយល់ព្រមលើ កិច្ចព្រមព្រៀងរវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាលនៃតំបន់រដ្ឋបាលពិសេសហុងកុង នៃសាធារណរដ្ឋ ប្រជាមា- និតចិន ស្តីពីការចៀសវាងការយកពន្ធត្រួតគ្នា និងបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល មានគោលបំណងទាក់ទាញ និងសម្រួលការវិនិយោគ និងពាណិជ្ជកម្មអន្តរជាតិ ព្រមទាំងទប់ស្កាត់និងបង្ការការកិបកេងបន្លំពន្ធទាំងក្នុងក្របខ័ណ្ឌជាតិនិងអន្តរជាតិ។

ឯកឧត្តមបណ្ឌិតរដ្ឋ បានមានប្រសាសន៍បន្តទៀតថា កម្ពុជាបានចាប់ផ្តើមចរចាកិច្ចព្រមព្រៀងខាងលើជាមួយរដ្ឋបាល ពិសេសហុងកុង ចាប់តាំងពីពាក់កណ្តាលឆ្នាំ២០១៧ រហូតបានបញ្ចប់ជាស្ថាពរ និងចុះហត្ថលេខារួចរាល់កាលពីពេលថ្មីៗនេះ។

សេចក្តីព្រាងច្បាប់នេះមាន៣ត្រា។ អង្គប្រជុំបានសម្រេចឯកភាពគ្នាដោយរក្សាអត្ថបទដើមទាំងស្រុងនៃសេចក្ដីព្រាងច្បាប់ ដោយគ្រាន់តែ កែសម្រួលអក្ខរាវិរុទ្ធអោយបានត្រឹមត្រូវ តាមវចនានុក្រមច្បាប់តែប៉ុណ្ណោះ។ ដោយឡែកនៅមានចំនុចមួយចំនួន ដែលមានលក្ខណៈ ស្មុគស្មាញ គណៈកម្មការជំនាញនឹងលើកយកទៅប្រជុំជាមួយតំណាងរដ្ឋាភិបាល ដើម្បីទទួលបានការស្រាយបំភ្លឺនាពេលខាងមុខ៕

អត្ថបទ និងរូបភាព ដោយនាយកដ្ឋានព័ត៌មាន