គណៈកម្មការសិទ្ធិមនុស្សរបស់សភាកម្ពុជា ដែលមានរដ្ឋសភា និងព្រឹទ្ធសភា បានកំពុងត្រៀមរៀបចំកម្មវិធីអបអរសាទរ ខួបលើកទី៧០ នៃទិវាសិទ្ធិមនុស្សអន្តរជាតិ១០ធ្នូ នាពេលខាងមុខនេះ ឲ្យបានអធិកអធម។ ការប្រុងប្រៀបរៀបចំនេះ បានលើកមកពិភាក្សាគ្នា រវាង      ឯកឧត្តម ប៉ា សុជាតិវង្ស ប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្កេត ទំនាក់ទំនងរដ្ឋសភាព្រឹទ្ធសភា នៃរដ្ឋសភា និងឯកឧត្តម យ៉ង់ សែម ប្រធានគណៈកម្មការសិទ្ធិមនុស្សទទួលពាក្យបណ្តឹង អង្កេត ទំនាក់ទំនងរដ្ឋសភាព្រឹទ្ធសភា នៃព្រឹទ្ធសភា នារសៀលថ្ងៃទី១៩ ខែវិច្ឆិកា ឆ្នាំ២០១៨ នៅវិមានរដ្ឋសភា ។

ឯកឧត្តម ប៉ា សុជាតិវង្ស បានមានប្រសាសន៏ថា សភាកម្ពុជា តែងតែរៀបចំកម្មវិធីអបអរសាទរទិវាសិទ្ធិមនុស្សជារៀងរាល់ឆ្នាំ ហើយបើ និយាយជារួមនៅកម្ពុជាវិញ សេរីភាពនិងសិទ្ធិមនុស្សត្រូវបានធានាដោយច្បាប់កំពូល។ ជារៀងរាល់ឆ្នាំ ការអបអរសាទរទិវាសិទ្ធិមនុស្ស បានរៀបចំ ធ្វើយ៉ាងទូលំទូលាយ ទំាងស្ថាប័ននីតិប្បញ្ញត្តិ នីតិប្រតិបត្តិ និងអង្គការសង្គមស៊ីវិល។

កិច្ចប្រជុំរវាងគណៈកម្មការសិទ្ធិមនុស្សរដ្ឋសភា និងព្រឹទ្ធសភា នាឱកាសនេះ បានពិភាក្សាលើ​ប្រធានបទ សម្រាប់អបអរទិវាសិទ្ធិមនុស្ស ១០ធ្នូ នោះផងដែរ៕