ទីក្រុងហ្សាកាតា៖ បណ្តាប្រទេសក្នុងតំបន់មានការឯកភាពផ្នែកនយោបាយយ៉ាងរឹងមាំ ដើម្បីជំរុញភាពស៊ីសង្វាក់រវាងទស្សនវិស័យអាស៊ានស្ដីពីឥណ្ឌូ-ប៉ាស៊ីហ្វិក (AOIP) និងគំនិតផ្ដួចផ្ដើមឥណ្ឌូ-ប៉ាស៊ីហ្វិកសេរីនិងបើកចំហ ( FOIP)។
ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរងរដ្ឋសភា និងជាប្រធានក្រុមទីប្រឹក្សារដ្ឋសភា បានលើកឡើងដូច្នេះក្នុងពិធីសម្ពោធការបើកបាឋកថាជាស៊េរី ស្តីពីទស្សនវិស័យអាស៊ានស្ដីពីឥណ្ឌូ-ប៉ាស៊ីហ្វិក (ASEAN Outlook on the Indo-Pacific- AOIP ) ដែលរៀបចំឡើងនៅរដ្ឋធានីហ្សាការតា ប្រទេសឥណ្ឌូនេស៊ី កាលពីថ្ងៃទី៩ កក្កដា។
ក្នុងវេទិកានោះ ឯកឧត្តមបណ្ឌិត ក៏បានលើកឡើងពីសារៈសំខាន់នៃការលើក កម្ពស់អភិបាលកិច្ចផ្តោតលើប្រជាពលរដ្ឋ ការពង្រឹងកិច្ចសហប្រតិបត្តិការអន្តរជាតិ និងការកសាងសមត្ថភាព ជាពិសេសលើវិស័យច្បាប់សមុទ្រ ដើម្បីរួមចំណែកថែរក្សាសន្តិភាព ស្ថិរភាព និងការអភិវឌ្ឍប្រកបដោយចីរភាពនៅក្នុងតំបន់ឥណ្ឌូ-ប៉ាស៊ីហ្វិក។
សូមជម្រាបផងដែរថា៖ ថ្លែងក្នុងពិធីបើកសម្ពោធបាឋកថា ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានលើកឡើងអំពីគោលការណ៍ស្នូលរបស់អាស៊ាន រួមមាន ភាពបើកចំហ បរិយាបន្ន កិច្ចសន្ទនា និងកិច្ចសហប្រតិបត្តិការក្នុងបរិបទដែលស្ថានភាពភូមិសាស្ត្រនយោបាយកាន់តែមានភាពស្មុគស្មាញ។
បាឋកថាជាស៊េរី ស្តីពីទស្សនវិស័យអាស៊ានស្ដីពីឥណ្ឌូ-ប៉ាស៊ីហ្វិកនេះ សហការរៀបចំដោយវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) និងវិទ្យាស្ថានកិច្ចការអន្តរជាតិជប៉ុន (JIIA)។ ថ្នាក់ដឹកនាំ អ្នកការទូត អ្នកស្រាវជ្រាវ និងអ្នកជំនាញមកពីបណ្តាប្រទេសនានា បានផ្លាស់ប្តូរទស្សនៈ គំនិតយោបល់ និងជំរុញកិច្ចសហប្រតិបត្តិការ សម្រាប់តំបន់ឥណ្ឌូ-ប៉ាស៊ីហ្វិកប្រកបដោយសន្តិភាព ស្ថិរភាព និងវិបុលភាព ៕
