កំពង់ឆ្នាំង៖ឯកឧត្តមបណ្ឌិត ហ៊ឺ វីរៈ តំណាងរាស្ត្រមណ្ឌលខេត្តកំពង់ឆ្នាំង និងក្រុមការងារ នាថ្ងៃទី២០ ខែមិថុនា ឆ្នាំ២០២៦បានអញ្ជើញសំណេះសំណាលជាមួយលោកគ្រូ-អ្នកគ្រូ និងក្មួយៗសិស្សមត្តេយ្យ នៅសាលាមត្តេយ្យសិក្សាសហគមន៍ភូមិក្រាំងតាឯក ឃុំពានី និងសាលាមត្តេយ្យសហគមន៍ភូមិជំទាវសុខ ឃុំច្រេស។

ក្នុងឱកាសនោះ ឯកឧត្តមបណ្ឌិត បានជូនវត្ថុកំដរដៃដល់អ្នកគ្រូ លោកគ្រូក្នុងម្នាក់ៗទទួលបានក្រមា ១ និងថវិកាមួយចំនួន ។ចំណែកកុមារតូចៗចំនួន ៧១នាក់ ក្នុងម្នាក់ៗទទួលបានសម្ភារៈសិក្សា ១ឈុត។

បន្ទាប់ពីនោះ ឯកឧត្តមបណ្ឌិត បានអញ្ជើញពិនិត្យវឌ្ឍនភាពនៃការសាងសង់រោងបរិភោគអាហារពេលព្រឹករបស់សិស្សានុសិស្ស និងស៊ីទែនស្ដុកទឹក នៅសាលា បឋមសិក្សាជំទាវសុខ ឃុំច្រេស។

នៅថ្ងៃដដែលនោះ ឯកឧត្តមបណ្ឌិត បានបន្តដំណើរជួបសំណេះសំណាលជាមួយមន្ត្រីនគរបាលប៉ុស្តិ៍រដ្ឋបាលកំពង់ ត្រឡាច ដើម្បីពិភាក្សា និងផ្លាស់ប្តូរមតិយោបល់លើការងារសន្តិសុខសង្គម ដូចជា ស្ថិតិប្រជាពលរដ្ឋ ការងារថតអត្តសញ្ញាណ បណ្ណ ការធ្វើសៀវភៅគ្រួសារ និងការងារពង្រឹងគោលនយោ បាយភូមិ-ឃុំមានសុវត្ថិភាព។

ឯកឧត្តមបណ្ឌិត និងក្រុមការងារ បានបន្តអញ្ជើញប្រគល់ផ្ទះថ្មីជូនគ្រួសារដែលមានជីវភាពខ្វះខាត ១គ្រួសារ ដែលមានសមាជិកក្នុងបន្ទុកសរុបចំនួន ៨នាក់ រស់នៅភូមិវត្ត ឃុំលង្វែក ស្រុកកំពង់ ត្រឡាច។ ជាមួយគ្នានោះ ឯកឧត្តមបណ្ឌិត ក៏បានជូននូវសម្ភារៈប្រើប្រាស់ក្នុងផ្ទះមួយចំនួនរួមមាន កន្ទេល ១ មុង ១ ភួយ ១ និងខ្នើយចំនួន ២ ជូនដល់គ្រួសារខាងលើផងដែរ។ ផ្ទះថ្មីនេះមានទំហំ ៥ គុណនឹង ៦ម៉ែត្រ ធ្វើពីដែកចាក់សាបបេតុង និងមាន ការចូលរួមចំណែកសាងសង់ពីក្រុមការងារចុះមូលដ្ឋានស្រុក និងក្រុមការងារចុះមូលដ្ឋានឃុំលង្វែក៕