វិមានរដ្ឋសភា៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានស្នើដលរដ្ឋាភិបាលសិង្ហបុរី តាមរយៈ ឯកឧត្តម ប៉ាង ឈី វី (PANG Chee Wee) ឯកអគ្គរដ្ឋទូតសិង្ហបុរីទើបតែងតាំងថ្មីនៅកម្ពុជា ជួយផ្តល់ការគាំទ្រ និងបណ្តុះបណ្តាលបច្ចេកទេស ជាពិសេសលើផ្នែក ICT និងបញ្ញាសិប្បនិម្មិត (AI) ដល់មន្ត្រីរាជការនៃអគ្គលេខាធិការដ្ឋានរដ្ឋសភា។
សម្តេចរដ្ឋសភាធិបតី បានសង្កត់ធ្ងន់ថា៖ «ការកសាងសភាឌីជីថល ចំណុចគន្លឹះគឺការវិនិយោគលើធនធានមនុស្ស ឱ្យមានចំណេះដឹង និងជំនាញ ឌីជីថលពិតប្រាកដ» ដើម្បីបង្កើនល្បឿន ប្រសិទ្ធភាព និងតម្លាភាពក្នុងការបម្រើសេវាជូនប្រជាពលរដ្ឋ។
ជាការឆ្លើយតប ឯកឧត្តមឯកអគ្គរដ្ឋទូត បានសម្តែងការឯកភាពទាំងស្រុង និងប្តេជ្ញាចិត្តយ៉ាងមុតមាំ ក្នុងការបន្តជំរុញការអភិវឌ្ឍធនធានមនុស្ស ដែលជាស្នូលនៃកិច្ចសហប្រតិបត្តិការទ្វេភាគី ក្រោមគោលការណ៍ «ឈ្នះ-ឈ្នះ» ដើម្បីផលប្រយោជន៍ទៅវិញទៅមកនៃប្រជាជាតិទាំងពីរ។