នៅក្នុងការអនុម័តច្បាប់ និងការពង្រឹងសេវាយុត្តិធម៌ រយៈពេលជាងពីរឆ្នាំមកនេះ គណៈកម្មការនីតិកម្ម និងយុត្តិធម៌ (គណៈកម្មការទី៦) នៃរដ្ឋសភា បានបំពេញតួនាទីយ៉ាងសកម្មនៅក្នុងការអនុម័តច្បាប់ រាប់តាំងពីការតាក់តែង ពិនិត្យ និងសិក្សាច្បាប់ ព្រមទាំងការពង្រឹងសេវាយុត្តិធម៌ជូនប្រជាពលរដ្ឋនៅតាមមូលដ្ឋាន។
ឯកឧត្តម អង្គ វង្ស វឌ្ឍានា ប្រធានគណៈកម្មការ បានគូសបញ្ជាក់ថា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា មានចក្ខុវិស័យច្បាស់លាស់ យកប្រជាពលរដ្ឋជាស្នូល។ នៅលើមុខងារនីតិកម្ម ក្នុងរយៈពេលជាងពីរឆ្នាំនៃនីតិកាលទី៧នេះ រដ្ឋសភាបានអនុម័តច្បាប់បានប្រមាណ ៦៥ច្បាប់។
តាមរយៈបទសម្ភាសន៍ជាមួយ កម្មវិធីណែនាំអំពីរដ្ឋសភា ឯកឧត្តម អង្គ វង្ស វឌ្ឍានា បានជម្រាបជូនយ៉ាងលម្អិតអំពីច្បាប់ដែលរដ្ឋសភាបានអនុម័ត ក៏ដូចជាបានបង្ហាញពីសកម្មភាព និងសមិទ្ធផលជាច្រើន ដែលគណៈកម្មការសម្រេចបាននៅក្នុងការបម្រើប្រទេសជាតិ និងប្រជាពលរដ្ឋ។