ទំព័រមុខ » ព័ត៌មាន » ព័ត៌មានប្រចាំថ្ងៃ » អគ្គលេខាធិការដ្ឋានរដ្ឋសភា ចុះកិច្ចសន្យាសេវាធានារ៉ាប់រងសុខភាពជូនតំណាងរាស្រ្តក្នុងឆ្នាំ២០១៨
អគ្គលេខាធិការដ្ឋានរដ្ឋសភា ចុះកិច្ចសន្យាសេវាធានារ៉ាប់រងសុខភាពជូនតំណាងរាស្រ្តក្នុងឆ្នាំ២០១៨
រៀបរៀងដោយ ៖​ NA1472 ​ នៅថ្ងៃទី (1/15/2018 6:51:29 AM )

អគ្គលេខាធិការដ្ឋានរដ្ឋសភា នៅរសៀលថ្ងៃទី១៥ ខែមករា ឆ្នាំ២០១៨ បានចុះកិច្ចសន្យាធានារ៉ាប់រងសេវាសុខភាពជូនអ្នកតំណាងរាស្រ្តនីតិកាលទី៥ ក្នុងឆ្នាំ២០១៨ ជាមួយក្រុមហ៊ុនធានារ៉ាប់រងភីផលផាតនើរ ( People Partners Insurance Plc )។

ពិធីចុះហត្ថលេខានេះ បានធ្វើឡើងរវាង ឯកឧត្តម ឡេង ប៉េងឡុង អគ្គលេខាធិការរដ្ឋសភា ជាមួយ លោក Jeff Whittaker នាយកក្រុមហ៊ុន ធានារ៉ាប់រងភីផលផាតនើរ។ ពិធីនេះរៀបចំធ្វើឡើងនៅវិមានរដ្ឋសភា ដោយមានការចូលរួមពីសំណាក់ ឯកឧត្តម លោកជំទាវ សមាជិក សមា​ជិកា​ រដ្ឋសភា និងថ្នាក់ដឹក​នាំអគ្គលេខាធិការដ្ឋានរដ្ឋសភាជាច្រើនរូបផងដែរ។

ឯកឧត្តម ឡេង ប៉េងឡុង បានមានប្រសាសន៍លើកឡើងនៅក្នុងពិធីចុះកិច្ចសន្យានេះថា ក្រោមការដឹកនាំរបស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា សមាជិក សមាជិកា រដ្ឋសភាទំាងអស់ បានស្ថិតនៅក្រោមការយកចិត្តទុកដាក់ និងផ្តល់មធ្យោបាយនានា ដើម្បីធានាដល់ ការបំពេញភារកិច្ចជូនប្រទេសជាតិ និងពលរដ្ឋ។ ការធានារ៉ាប់រងសេវាថែទាំសុខភាពគឺជាសេវារដ្ឋបាល​មួយ ដែលរដ្ឋសភាបានផ្តល់ជូនសមាជិក សមាជិការដ្ឋសភាទំាងអស់។

សូមជម្រាបថា នេះជាឆ្នាំទី២ហើយដែលអគ្គលេខាធិការដ្ឋានរដ្ឋសភា បានចុះកិច្ចសន្យាជា​មួយ​ក្រុមហ៊ុនឯកជន ក្នុងការផ្តល់សេវាធានារ៉ាប់រងសុខភាព ជូនតំណាងរាស្រ្ត។ មធ្យោបាយនេះ ត្រូវបានជ្រើសរើសដើម្បីធានាថា ការផ្តល់សេវាថែទំា និងព្យាបាលសុខភាព ជូនតំណាងរាស្រ្តកាន់តែមាន ប្រសិទ្ធិភាព និងងាយស្រួលជាងការប្រតិបត្តិលើកមុនៗ ដែលអគ្គលេខាធិការដ្ឋានរដ្ឋសភាផ្តល់ជាថវិកាជូនសមាជិករដ្ឋសភាម្នាក់ៗនោះ។

ឯកឧត្តម ឡេង ប៉េងឡុង បានមានប្រសាសន៍ថា អគ្គលេខាធិការដ្ឋានរដ្ឋសភា គឺជាសេនាធិការរបស់រដ្ឋសភា ដែលមានកាតព្វកិច្ចផ្តល់សេវា បច្ចេកទេស និងថវិកាសម្រាប់ជូនសមាជិកសមាជិការដ្ឋសភា បំពេញភារកិច្ចជូនប្រជាពលរដ្ឋម្ចាស់ឆ្នោត និងប្រទេសជាតិជា
អចិន្ត្រៃយ៍

អត្ថបទនិងរូបភាពដោយនាយកដ្ឋានព័ត៌មាន

វិថីរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ ព្រះរាជាណាចក្រកម្ពុជា
ទូរសព័្ទ ​លេខ: (855-23) 213 535, 220 628 ទូរសារ: (855-23)220 629
សារអេឡិចត្រូនិច: sg@national-assembly.org.kh, sg@nac.org.kh
គេហទំព័រ www.national-assembly.org.kh, www.nac.org.kh