ឯកឧត្តមបណ្ឌិត ងួន ញ៉ិល អនុប្រធានទី២ នៃរដ្ឋសភា នៅព្រឹកថ្ងៃទី២៥ ខែកុម្ភៈ ឆ្នាំ២០១៧ បានអញ្ជើញ ជាអធិបតី ក្នុងពិធីបុណ្យពុទ្ធាភិសេក និងសម្ពោធសមិទ្ធផលនានាក្នុងវត្តឥន្ទវិសាល ហៅវត្តអ្នកវាំង ឃុំស្រឡៅ ស្រុកបារាយណ៍ ខេត្តកំពង់ធំ ដោយមានការចូលរួមពី ប្រជាពុទ្ធបរិស័ទ ជិតឆ្ងាយយ៉ាងច្រើនកុះករ។

នៅក្នុងពិធីនេះ ឯកឧត្តមបណ្ឌិត បានលើកឡើង ពីការរីកចម្រើនរបស់ប្រទេសជាតិ ក៏ដូចជាវិស័យព្រះពុទ្ធសាសនានៅកម្ពុជា ក្រោមការដឹកនាំ និងយកចិត្តទុកដាក់ របស់ថ្នាក់ដឹកនាំកំពូលៗ នៃស្ថាប័នសំខាន់ៗរបស់ជាតិ ដែលមាន សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី។

ឯកឧត្តមបណ្ឌិតអនុប្រធានទី២នៃរដ្ឋសភា បានគូសបញ្ជាក់ថា សមិទ្ធផលដែលដាក់សម្ពោធនៅក្នុងវត្តឥន្ទវិសាល ហៅវត្តអ្នកវាំងនាពេលនេះ គឺជា សមិទ្ធផលមួយ នៅក្នុងចំណោមសមិទ្ធផលជាច្រើន នៅក្នុងវត្តរាប់រយ នៅទូទំាងប្រទេស ដែលកំពុងអភិវឌ្ឍន៍ ហើយបានក្លាយជាទីគោរពសក្ការៈរបស់ ប្រជាពលរដ្ឋ។

“ថ្នាក់ដឹកនាំស្ថាប័ននីតិប្បញ្ញត្តិ និងនីតិប្រតិបត្តិ បាននាំមកជូនប្រទេសជាតិ និងប្រជាជននូវជីវិតទី២ សិទ្ធិសេរីភាពគ្រប់បែបយ៉ាង សុខសន្តិភាព និងការអភិវឌ្ឍលើគ្រប់វិស័យ ក្នុងនោះក៏មានវិស័យព្រះពុទ្ធសាសនាផងដែរ “នេះជាការគូសបញ្ជាក់របស់ ឯកឧត្តមបណ្ឌិត ងួន ញ៉ិល។

សូមជម្រាបថា វត្តឥន្ទវិសាល ដើមឡើយមានឈ្មោះថាវត្តស្រឡៅ ជាវត្តចាស់បុរាណមួយ ប៉ុន្តែវត្តអារាមនេះ មិនខុសពីវត្តអារាមនានានៅទូទំាង ប្រទេសទេ បានទទួលរងការវាយបំផ្លាញពីរបបប៉ុលពល និងត្រូវបានជួសជុលឡើងវិញនៅក្រោយថ្ងៃ៧មករា ឆ្នាំ១៩៧៩។

ចំពោះសមិទ្ធផល ដែលដាក់សម្ពោធនាឱកាសនេះ ត្រូវបាន លោក ហាក់ ម៉ុងហួត អភិបាលនៃគណៈអភិបាលស្រុកបារាយណ៍ ឲ្យដឹងថា បានចំណាយថវិកាចំនួន២១៦.១១៦ដុល្លារ។ ឯកឧត្តមបណ្ឌិត ងួន ញ៉ិល និងឥស្សរជនសំខាន់ៗផ្សេងទៀត ជាអ្នកដឹកនាំផ្តួចផ្តើមការសាងសង់ អភិវឌ្ឍន៍វត្តឥន្ទវិសាលរហូតមក។

បន្ទាប់ពីបានធ្វើការសំណេះសំណាល ជាមួយប្រជាពុទ្ធបរិស័ទ ក្នុងបរិយាកាសសប្បាយរីករាយ ស្និទ្ធស្នាលរួចមក ឯកឧត្តមបណ្ឌិត ងួន ញ៉ិល បាន បំពាក់គ្រឿងឥស្សរិយយស និងមេដាយស្ថាបនាជាតិ ប្រគេនព្រះសង្ឃ ជូនមន្ត្រីរាជការ សប្បុរសជន ដែលបានចូលរួមចំណែកកសាងអភិវឌ្ឍន៍ប្រទេស និងលើកកម្ពស់វិស័យព្រះពុទ្ធសាសនា នៅក្នុងខេត្តកំពង់ធំ ពិសេសស្រុកបារាយណ៍នេះ ជាច្រើនអង្គ និងរូបផងដែរ៕

អត្ថបទនិងរូបភាពដោយនាយកដ្ឋានព័ត៌មាន