ទំព័រមុខ » ព័ត៌មាន » ព័ត៌មានប្រចាំថ្ងៃ » រដ្ឋសភានឹងពិភាក្សាអនុម័តសំណើវិសោធនកម្មបទបញ្ជាផ្ទៃក្នុងរដ្ឋសភា និយាយពីថ្នាក់ដឹកនាំ ប្រធានក្រុមតំណាងរាស្រ្ត មានអាសនៈក្នុងរដ្ឋសភា នៅថ្ងៃទី៣១ មករា
រដ្ឋសភានឹងពិភាក្សាអនុម័តសំណើវិសោធនកម្មបទបញ្ជាផ្ទៃក្នុងរដ្ឋសភា និយាយពីថ្នាក់ដឹកនាំ ប្រធានក្រុមតំណាងរាស្រ្ត មានអាសនៈក្នុងរដ្ឋសភា នៅថ្ងៃទី៣១ មករា
រៀបរៀងដោយ ៖​ NA1472 ​ នៅថ្ងៃទី (1/25/2017 8:56:33 PM )

រដ្ឋសភានឹងបើកសម័យប្រជុំ រដ្ឋសភាជាវិសាមញ្ញ នៅថ្ងៃទី៣១ ខែមករា ឆ្នាំ២០១៧ ខាងមុខនេះ ដើម្បីពិភាក្សា និងអនុម័ត សេចក្តីស្នើវិសោធនកម្ម បទបញ្ជាផ្ទៃក្នុងនៃរដ្ឋសភា ត្រង់ជំពូកទី១២ថ្មី ប្រការ៤៨ថ្មី(បី) នេះបើតាម លទ្ធផលកិច្ចប្រជុំ គណៈកម្មាធិការអចិន្ត្រៃយ៍រដ្ឋសភា នៅព្រឹកថ្ងៃទី២៦ ខែមករា ឆ្នាំ២០១៧នេះ។​

ជំពូកទី១២ថ្មី ប្រការ៤៨ថ្មី(បី) នៃបទបញ្ជាផ្ទៃក្នុង នៃរដ្ឋសភា និយាយអំពីតួនាទី និងភារកិច្ច ថ្នាក់ដឹកនាំតំណាងរាស្រ្ត និងប្រធានក្រុមតំណាងរាស្រ្ត នៃគណបក្សនយោបាយ ដែលមានអា​សនៈ​ក្នុងរដ្ឋសភា។ តំណាងរាស្រ្ត​ចំនួន៥២រូប បានចុះហត្ថលេខា ស្នើសុំវិសោធនកម្មនេះ។ សំណើនេះ​ត្រូវបាន គណៈកម្មការនីតិកម្ម និងយុត្តិធម៌ នៃរដ្ឋសភា បានពិនិត្យសិក្សាឃើញ​ថា មានទម្រង់​ច្បាប់ត្រឹមត្រូវ និងបានស្នើសុំគណៈកម្មាធិការអចិន្ត្រៃយ៍រដ្ឋសភា បញ្ចូលក្នុងរបៀបវារៈសម័យប្រជុំរដ្ឋសភាជាវិសាមញ្ញនេះ។

សម្ដេចអគ្គ​មហា​​ព​ញា​ចក្រី ហេង សំរិន ប្រធាន​រដ្ឋសភា បានដឹកនាំ កិច្ចប្រជុំគណៈកម្មាធិការអចិន្ត្រៃយ៍ នៃរដ្ឋសភា នៅព្រឹកថ្ងៃទី២៦ ខែមករានេះ។ ក្រៅពីបានអនុម័តរបៀបវារៈ និងកំណត់កាលបរិច្ឆេទ សម្រាប់សម័យប្រជុំរដ្ឋសភាជាវិសាមញ្ញហើយ គណៈកម្មាធិការអចិន្ត្រៃយ៍រដ្ឋសភា ក៏បានអនុម័ត សមាសភាពលេខាធិការ៣រូប សម្រាប់សម័យប្រជុំរដ្ឋសភាជាវិសាមញ្ញ នីតិកាលទី៥ នោះផងដែរ។

សមាសភាពលេខាធិការទំាងបីរូប ដែលបានអនុម័តសម្រេចមាន ឯកឧត្តម ហ៊ុន ម៉ានី  ឯកឧត្តម ស សុខា និង ឯកឧត្តម ជា ប៉ូច

ព័ត៌មាននិងរូបភាពដោយនាយកដ្ឋានព័ត៌មាន

វិថីរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ ព្រះរាជាណាចក្រកម្ពុជា
ទូរសព័្ទ ​លេខ: (855-23) 213 535, 220 628 ទូរសារ: (855-23)220 629
សារអេឡិចត្រូនិច: sg@national-assembly.org.kh, sg@nac.org.kh
គេហទំព័រ www.national-assembly.org.kh, www.nac.org.kh