និស្សិតផ្នែកទេសចរណ៍ និងអប់រំ នៃសាកលវិទ្យាល័យប៊ែលធី អន្តរជាតិចំនួន ១២០នាក់ បានមកធ្វើទស្សនកិច្ចសិក្សាស្វែងយល់ពីតួនាទីភារកិច្ច របស់រដ្ឋសភា នៃព្រះរាជាណាចក្រកម្ពុជា នាព្រឹកថ្ងៃទី១១ ខែឧសភា ឆ្នាំ២០២៣ នៅវិមានរដ្ឋសភា។

ឯកឧត្តម ឃុត ចាន់ដារ៉ា សមាជិកគណ:កម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា រួមជាមួយឯកឧត្តម ឡេង ប៉េងឡុង អគ្គលេខាធិការរដ្ឋសភា និងសហការី បានទទួលស្វាគមន៍ និងធ្វើបទបង្ហាញជូនដល់និស្សិតទាំងអស់ បានយល់ដឹងអំពី ប្រវត្តិរបស់រដ្ឋសភា កម្ពុជាដែលមានការវិវឌ្ឍ ពីដំណាក់កាលមួយទៅដំណាក់កាលមួយ តាំងពីការកកើតរហូតមកដល់បច្ចុប្បន្ន។  

ឯកឧត្ដម ឃុត ចាន់ដារ៉ា ក៏ជម្រាបជូនអំពីតួនាទីភារកិច្ចសំខាន់ទាំងបីរបស់រដ្ឋសភា ដែលមានដូចជា ការងារនីតិកម្ម ការតាមដានការអនុវត្តច្បាប់ និងភាពជាតំណាងរបស់ប្រជាពលរដ្ឋ។  លើសពីនោះទៀត និស្សិតទាំងអស់ក៏បានយល់ដឹងពីតួនាទីរបស់គណៈកម្មាធិការអចិន្ត្រៃយ៍រដ្ឋសភា តួនាទី ភារកិច្ចរបស់គណៈកម្មការជំនាញនៃរដ្ឋសភា ពិសេសការបញ្ជាក់លើការងារនីតិកម្មរបស់រដ្ឋសភា មានតាំងពីការរៀបចំពិនិត្យសិក្សាសេចក្តីព្រាងច្បាប់ សេចក្តីស្នើច្បាប់ ដំណើរការនៃការពិភាក្សាអនុម័តសេចក្តីព្រាងច្បាប់ ឬសេចក្តីស្នើច្បាប់នៅក្នុងសម័យប្រជុំរបស់រដ្ឋសភា ក៏ដូចជាដំណើរការ នៃការបើកសម័យប្រជុំ រដ្ឋសភា និងដំណើរការប្រជាធិបតេយ្យនៅក្នុងរដ្ឋសភាកម្ពុជា ជាដើម។

ជាមួយគ្នានេះ ឯកឧត្តម ឡេង ប៉េងឡុង អគ្គលេខាធិការរដ្ឋសភា ក៏បានមានប្រសាសន៍ជម្រាបជូន អំពីតួនាទីភារកិច្ចរបស់អគ្គលេខាធិការដ្ឋានរដ្ឋសភា ដែលជាសេនាធិការរដ្ឋបាលរបស់រដ្ឋសភា ជូនដល់និស្សិតទាំងអស់បានយល់ដឹងផងដែរ។

ឯកឧត្តម លី ណាវុឌ្ឍ សាកលវិទ្យាធិការ នៃសាកលវិទ្យាល័យប៊ែលធី បានថ្លែងអំណរគុណ និងបង្ហាញនូវចំណាប់អារម្មណ៍ចំពោះដំណើរទស្សនកិច្ចសិក្សា ស្វែងយល់នៅវិមានរដ្ឋសភានាពេលនេះថា គឺជាការលើកទឹកចិត្ត និងពង្រឹងសមត្ថភាពបន្ថែម ដល់និស្សិត ដោយសារតែរដ្ឋសភាគឺជាស្ថាប័ននីតិប្បញ្ញត្តិ កំពូលមួយដ៏មានសារៈសំខាន់ តំណាងឲ្យឆន្ទៈរបស់ប្រជាពលរដ្ឋ។ ម៉្យាងទៀត ដំណើរទស្សនកិច្ចសិក្សានេះ ក៏ជាឱកាសសម្រាប់និស្សិតទទួលបាន បទពិសោធន៍ល្អៗ និងបានសិក្សាយល់ដឹងបន្ថែមទៀត ពីតួនាទីភារកិច្ចរបស់រដ្ឋសភា ។