រដ្ឋសភានៃព្រះរាជាណាចក្រកម្ពុជា នាព្រឹកថ្ងៃព្រហស្បតិ៍ ទី៣០ ខែមីនា ឆ្នាំ២០២៣នេះ បានបើកសម័យប្រជុំរដ្ឋសភាលើកទី៩ នីតិកាល- ទី៦ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា។

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានផ្ញើព្រះរាជសារជូន សម័យប្រជុំរដ្ឋសភា ដោយព្រះអង្គបានសម្តែងហឬទ័យសោមនស្សរីករាយ ដោយបានឃើញថា ជិត៣០ឆ្នាំកន្លងមកនេះ គឺចាប់ពីការ បោះឆ្នោតទូទៅឆ្នាំ១៩៩៣មក ប្រជាជាតិកម្ពុជាយើងសម្រេចបានការថែរក្សា ការពង្រឹង ការគោរពរបបរាជានិយម ប្រជាធិបតេយ្យ សេរីពហុបក្ស ព្រមទំាងបានអភិវឌ្ឍន៍ប្រទេសជាតិ ឱ្យមានការរីកចម្រើនលើគ្រប់វិស័យ។

ព្រះករុណាជាអម្ចាស់បានកោតសរសើរថ្នាក់ដឹកនាំគ្រប់ជាន់ថ្នាក់ និងជនរួមជាតិគ្រប់រូប ដែលបានខិតខំយ៉ាងស្វាហាប់ក្នុងការបំពេញរាល់ ភារកិច្ចរៀងៗខ្លួន ជាហេតុនាំឱ្យកើតមាននូវសមិទ្ធផលដ៏ធំធេងហួសពីការស្មានក្នុងពេលបច្ចុប្បន្ន។

ព្រះអង្គបានកោតសរសើររដ្ឋសភា ដែលបានអនុម័តច្បាប់សំខាន់ៗបានចំនួន១០៩ នៅក្នុងនីតិកាលទី៦នេះ ដែលជាឧបករណ៍បំពេញ បន្ថែមទៅលើច្បាប់ដែលបានអនុម័តរួចនៅនីតិកាលមុនៗ និងជាការបំពេញបន្ថែមដ៏មានសារៈសំខាន់បំផុត ដែលធានានូវនិរន្តរភាព នៃ ដំណើរឈានឡើង និងកែលម្អលទ្ធិប្រជាធិបតេយ្យអាស្រ័យធម្មនុញ្ញរបស់យើង។

ក្រៅពីការតាក់តែងច្បាប់ខាងលើថ្នាក់ដឹកនាំរដ្ឋសភា ដែលមាន សម្តេចអគ្គមហាពញាចក្រី ហេង សំរិន ប្រធានរដ្ឋសភា ឯកឧត្តម កិត្តិសេដ្ឋាបណ្ឌិត អនុប្រធានទី១ លោកជំទាវកិត្តិសង្គហបណ្ឌិត អនុប្រធានទី២ ព្រមទំាង សម្តេច ឯកឧត្តម លោកជំទាវ ជាសមាជិក សមាជិការដ្ឋសភាទំាងអស់ បានខិតខំយកអស់កម្លាំងកាយចិត្ត ចុះសួរសុខទុក្ខប្រជាពលរដ្ឋនៅតាមមណ្ឌលដែលខ្លួនទទួលខុសត្រូវយ៉ាង សស្រាកសស្រាំ និងបាននាំយកនូវសំណូមពរ និងក្តីកង្វល់របស់ប្រជាពលរដ្ឋ រួមគ្នាដោះស្រាយទៅតាមនីតិវិធីបានយ៉ាងល្អប្រសើរ។

ជាមួយគ្នានេះ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានកោត- សរសើរចំពោះរដ្ឋសភា និងរាជរដ្ឋាភិបាល ដែលបានបំពេញតួនាទីយ៉ាងធំធេង ក្នុងនាមព្រះរាជាណាចក្រកម្ពុជា ទទួលធ្វើជាម្ចាស់ផ្ទះ រៀបចំកិច្ចប្រជុំធំៗនានាកន្លងទៅនេះ ជាអាទិ៍កិច្ចប្រជុំកំពូលអាស៊ាន មហាសន្និបាតអន្តរសភាអាស៊ាននិងកិច្ចប្រជុំពាក់ព័ន្ធជាច្រើនទៀត។ ភាពជោគជ័យដ៏មហោឡារិកនេះ គឺបាននាំមកនូវកិត្យានុភាពជូនជាតិមាតុភូមិ នៅលើឆាកអន្តរជាតិ ជាពិសេសការពង្រឹងពង្រីកវិស័យ ការទូត កិច្ចសហប្រតិបត្តិការជាមួយបណ្តាប្រទេសជាមិត្តឱ្យកាន់តែទូលំទូលាយនិងគ្រប់ជ្រុងជ្រោយ។

ព្រះអង្គបានកោតសរសើរ ចំពោះទេពកោសល្យ នៃការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងការដឹកនាំដោះស្រាយដោយជោគជ័យ នូវភាពលំបាកផ្ទួនៗឥតឈប់ឈរជាច្រើន ជាក់ស្តែងការស្តារ សេដ្ឋកិច្ចជាតិ ក្រោយវិបត្តិនៃជំងឺកូវីដ១៩ និងបេសកកម្មសំខាន់ៗលើការងារថែរក្សា សន្តិភាព ឯករាជ្យជូនប្រទេសជាតិ និងជូនប្រជា- ពលរដ្ឋបានរស់នៅដោយស្មើភាព ស្មើសិទ្ធិ និងសុខដុមរមនា។

ឆ្លៀតនៅក្នុងឱកាសនោះ ព្រះករុណាជាអម្ចាស់ក៏បានប្រគេនពរជូនដល់ជនរួមជាតិទំាងអស់ នៅក្នុងឱកាសចូលឆ្នាំថ្មីប្រពៃណីជាតិខាង- មុខនេះ បានប្រកបដោយសុខភាពល្អ សុភមង្គល សិរីសួស្តី គ្រប់ក្រុមគ្រួសារ និងត្រៀមលក្ខណៈចូលរួមបោះឆ្នោតជ្រើសតំាងតំណាង- រាស្រ្តនីតិកាលទី៧ នាពេលខាងមុខនេះឱ្យបានគ្រប់ៗគ្នា។

សូមជម្រាបថា នៅក្នុងថ្ងៃបើកសម័យប្រជុំលើកទី៩ នីតិកាលទី៦ នេះ សម័យប្រជុំរដ្ឋសភា មានរបៀបវារៈចំនួនបីគឺ៖

១-ព្រះរាជសារ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំ រដ្ឋសភា លើកទី៩ នីតិកាលទី៦។

២-របាយការណ៍សង្ខេបស្តីពី សកម្មភាពការងាររបស់រដ្ឋសភាចន្លោះសម័យប្រជុំរដ្ឋសភាលើកទី៨ និងលើកទី៩ នីតិកាលទី៦។

៣-ការពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើសន្ធិសញ្ញាកំណត់ព្រំដែនរដ្ឋ រវាងព្រះរាជាណាចក្រកម្ពុជា និង សាធារណរដ្ឋប្រជាធិបតេយ្យប្រជាមានិតឡាវ។

អត្ថបទ និងរូបភាព ដោយនាយកដ្ឋានព័ត៌មាន