សម្តេចអគ្គមហាពញាចក្រី ហេង សំរិន ប្រធានរដ្ឋសភា បានចាត់តំណាងដែលមាន ឯកឧត្តម ចាយ បូរិន ឯកឧត្តម កែវ ពិសិដ្ឋ សមាជិករដ្ឋសភា បានអញ្ជើញទៅសួរសុខទុក្ខ លោកជំទាវ ហូ ណូន អតីតសមាជិករដ្ឋសភា និងជាទីប្រឹក្សាជាន់ខ្ពស់រដ្ឋសភា ដែល ស្ថិតក្នុងវ័យជរា ដល់គេហដ្ឋានលោកជំទាវផ្ទាល់ នៅក្នុងរាជធានីភ្នំពេញ នាព្រឹកថ្ងៃទី១ ខែធ្នូ ឆ្នាំ២០២១នេះ។
ឯកឧត្តម ចាយ បូរិន បានពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និង សម្តេចតេជោ ហ៊ុន សែន នាយករដ្ឋមន្រ្តី ជូន លោកជំទាវ ហូ ណូន និង ក្រុមគ្រួសារ។ ឯកឧត្តមបានលើកឡើងថា ជានិច្ចជាកាលសម្តេចថ្នាក់ដឹកនាំស្ថាប័នីតិប្បញ្ញត្តិ និងនីតិប្រតិបត្តិ តែងតែយកចិត្តទុកដាក់ គិតគូរដល់សុខទុក្ខ និងជីវភាពរស់នៅរបស់ឥស្សរជនស្នេហាជាតិ ចាស់ព្រឹទ្ធាចារ្យ និវត្តន៍ជន ដែលមានគុណបំណាច់ចំពោះប្រទេសជាតិ មាតុភូមិ។
ឯកឧត្តមសមាជិករដ្ឋសភា បានសម្ដែងនូវមនោសញ្ចេតនា និងការគោរពដឹងគុណ កោតសរសើរដោយស្មោះចំពោះវីរៈភាព និងស្នាដៃ ដ៏ធំធេងជាច្រើនមិនអាចកាត់ថ្លៃបានរបស់លោកជំទាវ ដែលបានចូលរួមចំណែកក្នុងការស្តារ កសាង អភិវឌ្ឍន៍ប្រទេសជាតិរហូតមក។ ជាពិសេស លោកជំទាវ ហូ ណូន បានចូលរួមយ៉ាងសកម្មភាពនៅក្នុងការអភិវឌ្ឍប្រទេសជាតិ ការពង្រឹងនីតិរដ្ឋ ប្រជាធិបតេយ្យ និង ភាពជាតំណាងពលរដ្ឋ ដែលលោកជំទាវបានបំពេញការងារជាច្រើនអាណត្តិទំាងក្នុងក្របខ័ណ្ឌស្ថាប័ននីតិប្រតិបត្តិ នីតិប្បញ្ញត្តិ និងមាន វីរភាពក្នុងការបម្រើផលប្រយោជន៍គណបក្សនៅគ្រប់កាលៈទេសៈ ចំណាយទំាងកម្លំាង ស្មារតី ធនធាន ដោយមិនខ្លាចនឿយហត់ឡើយ និងបានចាត់ទុកគុណបំណាច់របស់ លោកជំទាវ ហូ ណូន នាពេលកន្លង ជាកេរដំណែល និងជាគំរូដ៏ល្អសម្រាប់យុវជនជំនាន់ក្រោយៗ បានរៀនសូត្រនិងអនុវត្តតាម។
ឯកឧត្តម ចាយ បូរិន ឯកឧត្តម កែវ ពិសិដ្ឋ បានបួងសួងដល់គុណបុណ្យព្រះរតនត្រ័យ វត្ថុស័ក្ដិសិទ្ធិក្នុងលោក តាមថែរក្សា លោកជំទាវ ហូ ណូន ឆាប់បានជាសះស្បើយពីជំងឺដង្កាត់នានា មានសុខភាពល្អ កម្លាំងមាំមួន និងជន្មាយុយឺនយូរ បានចូលរួមចំណែកបម្រើ គណបក្ស និងប្រទេសជាតិបន្តទៀត។
នៅក្នុងឱកាសនោះ បុត្រាបុត្រីរបស់ លោកជំទាវ ហូ ណូន ជួសមុខ លោកជំទាវ បានថ្លែងអំណរគុណយ៉ាងជ្រាលជ្រៅចំពោះ សម្តេច វិបុលសេនាភ្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និង សម្តេចតេជោ ហ៊ុន សែន នាយករដ្ឋមន្រ្តី ដែលតែងតែយកចិត្តទុក្ខដាក់ចំពោះសុខទុក្ខ លោកជំទាវ ហូ ណូន ជារៀងរហូតមក៕
អត្ថបទ និងរូបភាព ដោយនាយកដ្ឋានព័ត៌មាន