គណៈប្រតិភូគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា ដឹកនាំដោយ លោកជំទាវ និន សាផុន ប្រធានគណៈកម្មការ អមដំណើរដោយ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានអញ្ជើញចុះសិក្សា ស្វែងយល់ពីការងារសាងសង់ អាកាសយានដ្ឋានអន្តរជាតិសៀមរាបអង្គរថ្មី ដែលស្ថិតនៅក្នុងស្រុកសូត្រនិគម ខេត្តសៀមរាប នៅរសៀលថ្ងៃទី២៣ ខែកុម្ភៈ ឆ្នាំ២០២១។
លោកជំទាវ និន សាផុន បានមានប្រសាសន៍ថា ការសាងសង់ព្រលានយន្តហោះអន្តរជាតិដ៏ធំ នៅលើទឹកដីអង្គរនាខេត្តសៀមរាបនេះ គឺជាមោទនភាពមួយរបស់កម្ពុជា ដែលមានអាកាសយានដ្ឋានអន្តរជាតិដ៏ធំ មិនចាញ់អាកាសយានអន្តរជាតិរបស់បណ្តាប្រទេសនៅក្នុង តំបន់អាស៊ីអាគ្នេយ៍នោះឡើយ។ ទាំងនេះគឺជាការខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតី តេជោ ហ៊ុន សែន ជាប្រមុខដឹកនាំដ៏ឈ្លាសវៃ ក្នុងការកៀរគរអ្នកវិនិយោគទុនជាតិ និងអន្តរជាតិ ឱ្យមកបណ្តាក់ទុននៅកម្ពុជាអោយមាន ភាពរីកចម្រើនលើគ្រប់វិស័យ ជាពិសេសព្រលានយន្តហោះអន្តរជាតិសៀមរាប-អង្គរថ្មីនេះ នឹងជួយដល់សេដ្ឋកិច្ចកម្ពុជា ទាក់ទាញភ្ញៀវ ទេសចរណ៍បរទេស ឱ្យចូលមកទស្សនាប្រាង្គប្រាសាទនានារបស់ខ្មែរយើង បានកាន់តែច្រើនថែមទៀត។
លោកជំទាវប្រធានគណៈកម្មការក៏បានថ្លែងអំណរគុណចំពោះលោកនាយកក្រុមហ៊ុន Angkor International Airport Investment ដែល បានមកបណ្តាក់ទុនវិនិយោគលើការសាងសង់ព្រលានយន្តហោះអន្តរជាតិដ៏ធំ នៅលើទឹកដីអង្គរនាខេត្តសៀមរាបនេះ។
សូមជម្រាបថា កាសាងសង់អាកាសយានដ្ឋានអន្តរជាតិសៀមរាបអង្គរថ្មី ដែលសាងសង់លើផ្ទៃដីទំហំដីប្រមាណ៧០០ហិចតា បានចាប់- ផ្តើមដំណើរការសាងសង់ឡើងនៅថ្ងៃទី១៥ ខែមីនា ឆ្នាំ២០២០។ មកដល់ពេលនេះ គឺសម្រេចបានជាង៣០ភាគរយហើយ និងគ្រោង បញ្ចប់ការសាងសង់អោយបានរួចរាល់ជាស្ថាពរនៅថ្ងៃទី១៤ ខែមីនា ឆ្នាំ២០២៣ ក្រោមទំហំទឹកប្រាក់វិនិយោគ ចំនួន៩០០លានដុល្លារ សហរដ្ឋអាមេរិក ៕
អត្ថបទ និងរូបភាព ដោយនាយកដ្ឋានព័ត៌មាន