គណៈកម្មាធិការអចិន្ត្រៃយ៍រដ្ឋសភានៃព្រះរាជាណាចក្រកម្ពុជា បានបើកកិច្ចប្រជុំក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃអង្គារ ទី៧ ខែមេសា ឆ្នាំ២០២០។

អង្គប្រជុំគណៈកម្មកាធិការអចិន្រ្តៃយ៍រដ្ឋសភាបានធ្វើការពិភាក្សា និងអនុម័តតាមរបៀបវារៈ ដោយមានលទ្ធផលដូចខាងក្រោម៖

អង្គប្រជុំបានអនុម័តទទួលស្គាល់ លោកជំទាវ នូ សុវណ្ណនី ជាតំណាងរាស្រ្តមណ្ឌលខេត្តតាកែវ ជំនួស ឯកឧត្តម ជា វ៉ាន់ដេត ដែលបាន សុំលាលែង។ ការប្រកាសសុពលភាព នៃអាណត្តិរបស់ លោកជំទាវ នូ សុវណ្ណនី ជាសមាជិការដ្ឋសភានីតិកាលទី៦ នឹងធ្វើឡើងនៅក្នុង សម័យប្រជុំរដ្ឋសភា នាពេលខាងមុខនេះ។

អង្គប្រជុំបានអនុម័តសំណើសុំផ្លាស់ប្តូរមុខតំណែងតំណាងរាស្រ្តនៃគណបក្សប្រជាជនកម្ពុជា ដើម្បីដាក់ជូនសម័យប្រជុំរដ្ឋសភា នាពេល ខាងមុខ បោះឆ្នោតផ្តល់សេចក្តីទុកចិត្ត ផ្ទេរ និងជ្រើសតាំង ឯកឧត្តម ឡូយ សុផាត ជាប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ជំនួស ឯកឧត្តម ជា វ៉ាន់ដេត ជ្រើសតាំង ឯកឧត្តម ចាយ បូរិន ជាអនុប្រធានគណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្ម ជំនួស ឯកឧត្តម ឡូយ សុផាត ជ្រើសតាំង លោកជំទាវ លី គឹមលៀង ជាលេខាធិការ គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម ជំនួស ឯកឧត្តម ចាយ បូរិន ជ្រើសតាំង ឯកឧត្តម ស៊ូ ភិរិន្ទ ជាសមាជិក គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម ជំនួស លោកជំទាវ លី គឹមលៀង។

អង្គប្រជុំបានអនុម័តប្រគល់សេចក្តីព្រាងច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន ដល់គណៈកម្មការនីតិកម្ម និងយុត្តិធម៌ នៃរដ្ឋសភា ដោយសហការជាមួយគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា ពិនិត្យ សិក្សា ហើយធ្វើ របាយការណ៍ជូន គណៈកម្មាធិការអចិន្រ្តៃយ៍រដ្ឋសភា វិញ។

អត្ថបទ និងរូបភាព ដោយនាយកដ្ឋានព័ត៌មាន