គណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា ដឹកនាំដោយ លោកជំទាវ និន សាផុន ប្រធានគណៈកម្មការ បានបើកកិច្ចប្រជុំផ្ទៃក្នុងគណៈកម្មការ ដើម្បីពិនិត្យ សិក្សាទៅលើសេចក្តីព្រាងច្បាប់ចំនួនបីទាក់ទងនឹងគម្រោងវិនិយោគលើវិស័យថាមពលអគ្គិសនី នៅរសៀលថ្ងៃទី១៨ ខែមីនាឆ្នាំ២០២០ នៅវិមានរដ្ឋសភា។
សេចក្ដីព្រាងច្បាប់ទាំងបីនោះរួមមាន៖
១-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន រ៉ូយ៉ាល់ គ្រុប អ៊ិនវេសម៉ិន គ្រុប ឯ.ក សម្រាប់គម្រោងវិនិយោគសាងសង់រោងចក្រអគ្គិសនីដុតធ្យូងថ្ម អានុភាព ៧០០មេហ្គាវ៉ាត់ ខេត្តកោះកុង។
២-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ហាន សេង ខូល ម៉ាញ សម្រាប់គម្រោងវិនិយោគសាងសង់ខ្សែបណ្តាញបញ្ជូនអគ្គិសនីតង់ស្យុង ២៣០គីឡូវ៉ុល តភ្ជាប់ពីរោងចក្រអគ្គិសនី ដុតធ្យូងថ្ម ខេត្តឧត្តរមានជ័យ មកអនុស្ថានីយសៀមរាបខាងកើត។
៣-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ហាន សេង ខូល ម៉ាញ សម្រាប់គម្រោងវិនិយោគសាងសង់រោងចក្រអគ្គិសនីដុតធ្យូងថ្ម អានុភាព ២៦៥មេហ្គាវ៉ាត់ ខេត្តឧត្តរមានជ័យ។
នៅក្នុងកិច្ចប្រជុំនាពេលនេះ គណៈកម្មការបានធ្វើការពិនិត្យសិក្សាទៅលើខ្លឹមសារ អក្ខរាវិរុទ្ធ និងទម្រង់ច្បាប់ ដោយលោកជំទាវប្រធាន គណៈកម្មការ បានស្នើដល់សមាជិកគណៈកម្មការទាំងអស់ ចូលរួមពិនិត្យ និងសិក្សា ទៅលើសេចក្តីព្រាងច្បាប់ទាំងបីខាងលើនេះ ឲ្យបានល្អិតល្អន់ និងគ្រប់ជ្រុងជ្រោយ ដើម្បីត្រៀមសម្រាប់ការជួបជជែកពិភាក្សាគ្នាបន្ថែមទៀត នៅក្នុងកិច្ចប្រជុំជាមួយតំណាងរាជរដ្ឋា- ភិបាលក្នុងពេលឆាប់ៗខាងមុខនេះ៕
អត្ថបទ និងរូបភាព ដោយនាយកដ្ឋានព័ត៌មាន