ក្នុងការត្រៀមរៀបចំកិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ (ASEP-11) ដែលសភាកម្ពុជានឹងធ្វើជាម្ចាស់ផ្ទះ នៅចុងឆ្នាំ២០២០ នោះ មកដល់ពេលនេះ សភាកម្ពុជា ដែលមានលេខាធិការដ្ឋានជាតិ ASEP-11ជាសេនាធិការ បានប្រជុំពិភាក្សាជ្រើសរើសនិមិត្តសញ្ញា និងទីកន្លែងរៀបចំកិច្ចប្រជុំ។
ឯកឧត្តម ឡេង ប៉េងឡុង អគ្គលេខាធិការរដ្ឋសភា និងជាប្រធានលេខាធិការដ្ឋានជាតិ ASEP-11 បានលើករបៀបវារៈខាងលើ មកជជែក ពិភាក្សានៅក្នុងកិច្ចប្រជុំក្រុមការងារ នារសៀលថ្ងៃទី៥ ខែធ្នូ ឆ្នាំ២០១៩ នៅវិមានរដ្ឋសភា។
បន្ទាប់ពីបានប្រជុំពិភាក្សាផ្លាស់ប្តូរយោបល់គ្នារួចមក កិច្ចប្រជុំបានសម្រេចជាបឋមថា កិច្ចប្រជុំASEP-11 នឹងប្រារព្ធធ្វើនៅរាជធានីភ្នំពេញ នៅថ្ងៃទី១៤ និងថ្ងៃទី១៥ ខែតុលា ឆ្នាំ២០២០ នៅសណ្ឋាគាររ៉េសុីដង់សុខាភ្នំពេញ។ ប្រធានលេខាធិការដ្ឋានជាតិ ASEP-11 បានគូស បញ្ជាក់ថា ការសម្រេចជ្រើសរើសទីតំាង និងនិមិត្តសញ្ញាកិច្ចប្រជុំ ASEP-11 នាពេលនេះ នឹងដាក់ជូនថ្នាក់ដឹកនាំសភាកម្ពុជាសម្រេច។
ជាមួយគ្នានេះ ឯកឧត្តម បានជំរុញដល់ក្រុមការងារបន្តខិតខំបំពេញភារកិច្ច តាមការសម្រេចរបស់ថ្នាក់ដឹកនាំ។ ក្រុមការងារដែលត្រូវ បំពេញភារកិច្ច ចាប់ពីពេលនេះទៅ ជាសំខាន់នោះ មានផ្នែកខ្លឹមសារ ពិធីការ ដឹកជញ្ជូន ព័ត៌មាន និងផ្សព្វផ្សាយ ជាដើម។
សូមជម្រាបថា កិច្ចប្រជុំ (ASEP) លើកទី១១ ដែលសភាកម្ពុជា ធ្វើជាម្ចាស់នេះ ជាផ្នែកមួយនៃកិច្ចប្រជុំកំពូលអាស៊ី-អឺរ៉ុប ហៅកាត់ថា (ASEM) ដែលរាជរដ្ឋាភិបាលកម្ពុជានឹងធ្វើជាម្ចាស់ផ្ទះ នៅឆ្នាំ២០២០ នោះដែរ។ កិច្ចប្រជុំ (ASEP) ដែលសភាកម្ពុជា ទទួលធ្វើជាម្ចាស់ផ្ទះ នេះ គ្រោងអញ្ជើញប្រតិភូសភាជាសមាជិក ASEP ប្រមាណ៥២ប្រទេសចូលរួម៕
អត្ថបទ និងរូបភាព ដោយនាយកដ្ឋានព័ត៌មាន